نام عبداللہ اور تخلص ساحر ہے۔۲۹؍دسمبر۱۹۳۶ء کو شیو، ضلع رتناگری، صوبہ مہاراشٹر(بھارت) میں پیدا ہوئے۔ زمانۂ طالب علمی ہی میں ان کی ادبی زندگی کا آغاز ہوا۔ مولانا قمر نعمانی سہسرامی اورجناب کالی داس گپتا رضا سے تلمذ حاصل رہا۔ ۱۹۹۴ء تا حال بریطانیہ میں مقیم ہیں۔ ذریعہ معاش ٹرانسپورٹ اور پرنٹنگ ہے۔ ساحر شیوی کے اب تک نوشعری مجموعے منظر عام پر آچکے ہیں۔ ان کے نام یہ ہیں:’ نیم شگفتہ‘، ’وقت کا سورج‘، ’صحرا کی دھوپ‘، ’سلسلہ منتشر خیالوں کا‘، ’پانچواں آسمان‘، ’ابھی منزل نہیں آئی‘،’ وسیلہ نجات‘(نعتیہ اور حمدیہ کلام) ،’وادی کوکن‘(ماہیے)، ’کوکن خوش بو‘، (ہائیکو) ۔’’صحرا کی دھوپ‘ ‘ کو مہاراشٹر اردو اکادمی نے ایوارڈ سے نوازا۔ ان کی پانچ نثر ی تخلیقات بھی شائع ہوچکی ہیں جن میں ’’کالی داس گپتا رضا۔شخص اور شاعر‘‘ اور ’’کیچ برڈ‘‘ (افسانوں کا مجموعہ) شامل ہیں۔ ساحر شیوی کو اردو ،ہندی اور مراٹھی زبان کے علاوہ انگریزی ، سواحلی(افریقی زبان) اور پنجابی زبان بھی آتی ہے۔ ساحر شیوی بانی اور سرپرست’’سفیر اردو‘‘ کو ڈاکٹریٹ کی اعزازی ڈگری تفویض کی گئی ہے۔ بحوالۂ:پیمانۂ غزل(جلد دوم)،محمد شمس الحق،صفحہ:324