مغلیہ خاندان کے چھٹے فرمانروا اورنگ زیب عالمگیر نے تقریباً پچاس سال تک حکومت کی اور اس کے عہد میں ہندوستان کا رقبہ جتنا وسیع ہوا، اتنا وسیع نہ اس سے پہلے ہوا اور نہ اس کے بعد، یعنی موجودہ افغانستان سے لے کر بنگلہ دیش کی آخری سرحدوں اورلداخ و تبت سے لے کر جنوب میں کیرالہ تک وسیع و عریض سلطنت کا قیام اسی بادشاہ کی دین ہے۔ زیر نظر کتاب "مآثیر عالم گیر" محمد ساقی مستعد خاں کی تحریر کردہ تاریخی کتاب ہے۔ اس کتاب میں اورنگ زیب عالمگیر بادشاہ کے پچاس سالہ عہد حکومت کی مکمل تاریخ بیان کی گئی ہے۔ اس تاریخ کو پڑھنے کے بعد اس بات کا اندازہ ہوتا ہے کہ عدل و انصاف اور غیر مسلم رعایا کے ساتھ حلم و بردباری و مربیانہ سلوک میں اورنگ زیب کو اپنے تمام اسلاف پر فوقیت حاصل ہے۔ مصنف مستعد خان چونکہ اورنگ زیب عالمگیر کے عہد میں ان کی خدمت پر مامور تھا، اس لیے مصنف نے اورنگ زیب کی زندگی کو بڑی قریب سے دیکھا تھا۔ اس لیے مصنف نے اورنگ زیب کے پچاس سالہ عہد کی تاریخ نہایت عمدہ انداز میں پیش کی ہے۔ اصل کتاب فارسی میں ہے جس کا اردو ترجمہ محمد فدا علی طالب نے کیا ہے۔