زیر نظر کتاب حفظان صحت سے متعلق ہے۔ اس کے مؤلف کو شمس الاطباء کا خطاب حاصل تھا ۔ وہ برطانیہ میں بمقام سیستان سفارتخانے میں میڈیکل آفیسر کی خدمات انجام دے چکے تھے،شہنشاہ ایران کے ڈاکٹر ٹیم میں شامل تھے اور سیستان ریاست کے حکمراں حسام الدولہ کے طبی مشیر بھی تھے۔ اس وقت آپ جس نسخے کا مطالعہ کررہے ہیں یہ جلد دوم ہے اور اس میں صرف ادویات کا ہی تذکرہ کیا گیا ہے۔ خاص بات یہ ہے کہ دواؤں کا نام لکھنے کے ساتھ ہی اس کی وجہ تسمیہ بھی لکھی گئی ہے۔ اگر اسی نام سے کوئی اور دوا موجود ہے تو اس کی تشریح ، دواؤں کا مرکب بنانے کی ترکیب اور اس کے استعمال کرنے کے طریقے اور افادیت پر مکمل روشنی ڈالی گئی ہے۔ اس طرح دیکھا جائے تو یہ کتاب ایک میڈیکل ڈکشنری کی حیثیت رکھتی ہے۔ کتاب میں ایک انوکھا طریقہ اختیار کیا گیا ہے جسے دیکھ کر آپ متحیر ہوں گے ۔ ہر صفحہ کے نیچے اور اوپر نمبر لگا ہوا ہے ۔ لیکن اس سے قاری اشتباہ میں نہ پڑیں۔ صفحہ کے نیچے جو نمبر ہے وہ اسی جلد کے ہیں اور جو صفحہ کے اوپر لکھے ہوئے ہیں وہ جلد اول اور جلد دوم کے مسلسل نمبر ہیں۔ فہرست مضامین میں انہی بالائی مسلسل نمبروں کا حوالہ دیا گیا ہے۔