زیر نظر کتاب "مسلم ثقافت ہندوستان میں" عبدالمجید سالک کی تصنیف ہے۔ مصنف نے اس کتاب کی تالیف کا مقصد بتایا ہے کہ مسلمانوں نے برصغیر پاک و ہند کو گزشتہ ہزار سال کی مدت میں کن برکات سے آشنا کیا اور اس ملک کی تہذیب و ثقافت پر کتنا وسیع اور گہرا اثر ڈالا۔ مذکورہ کتاب دس ابواب پر مشتمل ہے۔ کتاب کے آغاز میں ہندو مورخین و علما کی کتابوں سے قدیم ہندوستان کا سیاسی، مذہبی، اخلاقی، معاشرتی اور ادبی پس منظر بیان کیا گیا ہے۔ تیسرے باب کی پہلی فصل میں یہ بیان کیا گیا ہے کہ مسلمانوں کو میدان جنگ میں اس قدر فوقیت کیوں حاصل تھی۔ اس سلسلے میں بڑی بڑی جنگوں کا مختصر حال بیان کیا گیا ہے۔ فنون لطیفہ کے عنوان کے تحت "مغل بادشاہوں کے باغات" ، "فن تعمیراور معمار" ، "مصوری و خطاطی"، "موسیقی اور مسیقار" پر مفصل باب قلمبند کیے گئے ہیں، اور ایک باب "ہندوستان کے مذاہب" کے عنوان سے بھی شامل ہے۔ آخری باب میں مسلم حکومت کے زمانے میں عوامی زندگی کی کیفیت کیا تھی اور عام لوگوں کی معیشت کے متعلق کیا انتظامات کیے گئے تھے ان کا جائزہ لیا گیا ہے۔

نام عبدالمجید، سالک تخلص۔ ۱۳؍دسمبر ۱۸۹۴ء کو بٹالہ ، ضلع گورداس پورمیں پیدا ہوئے۔بی اے لاہور میں کیا۔ ۱۹۱۴ء میں پٹھان کوٹ سے رسالہ’’فانوس خیال‘‘ نکالا جو ایک سال جاری رہا۔۱۹۱۵ء کے اواخر میں ’’تہذیب نسواں‘‘ اور ’’پھول‘‘ کے اڈیٹر ہوئے۔ ۱۹۲۰ء میں ’’زمیندار‘‘ کی ادارت سنبھالی۔ ۱۹۲۷ء مولانا مہر کی معیت میں ’’انقلاب‘‘ کا اجرا کیا جوتیس سال تک جاری رہا۔ شعرگوئی، ادب، تنقیداور صحافت مشاغل رہے۔ حیات بخش رسا سے تلمذ حاصل تھا۔ ۲۷؍ ستمبر۱۹۵۹ء کو لاہور میں انتقال کرگئے۔ سالک کا لگاؤ نظم کی طرف زیادہ تھا۔ ان کے شعری مجموعہ کا نام ’’رہ و رسم منزلہا‘‘ ہے ان کی دیگر تصانیف کے نام یہ ہیں: ’ذکر اقبال‘ ، ’سرگزشت‘(خودنوشت)، ’یاران کہن‘، ’مسلم ثقافت ہندوستان میں‘۔