ناسخ اسکول کا سب سے بڑا کارنامہ اصلاح زبان ہے۔ لکھنؤیت سے شاعری کا جو خاص رنگ مراد ہے اور جس کا سب سے اہم عنصر خیال بندی کہلاتا ہے، وہ ناسخ اور ان کے شاگردوں کی کوشش و ایجاد کا نتیجہ ہے۔ ناسخ کے کلام کا بڑا حصہ شائع ہو چکا ہے۔ ان کے کلیات میں غزلیں، رباعیاں، قطعات، تاریخیں اور ایک مثنوی شامل ہے۔ زیر نظر کتاب "ناسخ: تجزیہ و تنقید" شبیہ الحسن کی لکھی ہوئی سوانحی کتاب ہے، اس کتاب میں انھوں نے امام بخش ناسخ کی شخصیت اور فن پر عمدہ مواد پیش کیا ہے، شبیہ الحسن نے اس کتاب کو چھ ابواب میں تقسیم کیا ہے۔ پہلے باب میں ناسخ کے ابتدائی حالات بیان کیے گئے ہیں۔ دوسرے باب میں ناسخ کے زمانے کے سیاسی حالات بیان کئے گئے ہیں، تیسرے باب میں ناسخ کے عادات و خصائل وغیرہ کا ذکر ہے، چوتھے باب میں ناسخ کے ادبی ورثہ کا تذکرہ ہے، پانچویں باب میں ناسخ کے تذکرہ نگاروں اور نقادوں کا تذکرہ ہے، جبکہ چھٹے باب میں ناسخ کی فنی خصوصیا ت کا بیان ہے۔