مولانا ظفر علی خاں شاعر اور صحافی تھے اور تحریک پاکستان کے اہم رہنماؤں میں شمار ہوتے تھے۔انہیں بابائے اردو صحافت کہا جاتا ہے۔ ان کی شاعرانہ کاوشیں بہارستان، نگارستان اور چمنستان کی شکل میں چھپ چکی ہیں ۔اس کے علاوہ بھی ان کی متعدد تصانیف منظر عام پر آچکی ہیں۔ آپ کے سامنے اس وقت ان کا مشہور مجموعہ " نگارستان " ہے ۔ اس میں مذہب و عقائد، سیاست و معاشرت اور اصلاحات کی نظمیں ہیں۔ خاص بات یہ ہے کہ نظموں کے استعارے کو سمجھانے کے لئے حاشیہ نمبر دیا ہوا ہے اور اس حاشیے میں پوری بات نثری انداز میں سمجھائی گئی ہے ۔ کئی موقعوں پر یہ حاشیہ طویل یہاں تک کہ ایک صفحے سے نکل کر دوسرے صفحے تک پھیلا ہوا ہے ۔ کہیں پر بھی اشعار کے معنی مرادی کو سمجھانے میں کوتاہی نہیں کی گئی ہے اور جہاں بھی معمولی اغلاق نظر آیا، حاشیہ میں اس کا خلاصہ یا مخصوص واقعہ کی طرف نشاندہی کردی گئی ہے۔ کوئی نظم کسی مخصوص موقع پر کہی گئی ہو تو اسے مکمل تاریخ کے ساتھ لکھ دیا گیا ہے ۔مثلاً مسجد انگور راولپنڈی پہنچتے ہیں اور مسجد کے روحانی منظر کو دیکھ کر ایسا متاثر ہوئے کہ ایک نظم کہہ دی، نظم سے پہلے ایک نثری تعارف ہے جس میں تاریخ ، ماہ اور دیگر تفصیل لکھی ہوئی ہے ، اس کے بعد نظم ہے۔ یہ صورت حال کتاب میں بار بار پیش آئی ہے۔ کتاب کا مطالعہ نظم و نثر دونوں کا مزہ دیتا ہے۔