پطرس بخاری اردو کے نامور مزاح نگار، افسانہ نگار، مترجم، شاعر، نقاد، معلم تھے۔ وہ انگریزی زبان سے اچھی طرح واقف تھے۔ انگریزی ادب پاروں کے اردو تراجم کے سلسلے میں بھی انھوں نے گراں قدر خدمات انجام دیں۔ زیر نظر کتاب "پطرس بخاری (کتابیات) کرنل غلام سرور کی مرتب کردہ کتاب ہے۔ اس کتاب میں نامور دانشور پروفیسر پطرس بخاری کی علمی و ادبی خدمات کا احاطہ کیا گیا ہے، کتاب کے شروع میں پطرس بخاری کا مختصر خاکہ پیش کیا گیا ہے، اس کے بعد بالترتیب پطرس بخاری کی تخلیقات کا اشاریہ پیش کیا گیا ہے۔

پاکستان کے ممتاز دانشور، کالم نگار، دفاعی تجزیہ نگار اور ادیب کرنل (ر) غلام سرور 31دسمبر1928ء کو جہلم میں پیدا ہوئے۔ وہ انگریزی، اردو اور علوم اسلامی میں ماسٹرز کی ڈگریاں حاصل کرنے کے بعد درس و تدریس کے شعبے سے منسلک ہو گئے تھے۔ بعد ازاں انہوں نے پاک فوج کی ایجوکیشن کور سے وابستگی اختیار کی۔ کرنل (ر) غلام سرور کی تصانیف میں تقدیر امم، مسافر حرم، پطرس ایک مطالعہ، مطالعہ اسلامیات اور ان کی خود نوشت سوانح ’’آئینہ ایام‘‘ کے نام شامل ہیں۔ حکومت پاکستان نے انہیں 1982ء میں ستارئہ امتیاز (ملٹری) کے تمغے سے سرفراز کیا۔
کرنل (ر) غلام سرور 21دسمبر 2009ء کو لاہور میں وفات پا گئے۔