زیر نظر کتاب میں قدیم اردو ادب کی تاریخ کا جائزہ لیا گیا ہے،اس کتاب میں محمد حسن نے نہ صرف 1800ء تک کی تاریخ بیان کی ہے بلکہ اردو ادب کی تاریخ بیان کرتے ہوئے اقتصادی اور سماجی حوالےسےایک تصویر پیش کی ہے، مصنف نے ترک، ایرانی اور افغانیوں کے آریاؤں سے تعلق اور رشتے کو بیان کرتے ہوئے اس مشترکہ تہذیب کو سامنے رکھ کر اردو ادب کی تاریخ بیان کی ہے، محمد حسن نے اس کتاب میں اردو کی ابتدا کے بارے میں اپنا نظریہ پیش کرتے ہوئے یہ ثابت کیا ہے کہ اردو زبان کی ابتدا ہندوستان میں سیاسی حملوں سے پہلے ہی ہو چکی تھی، انھوں نے اردوکی ابتدا کو عبد الرحمن کی کتاب سندیش راشک سے جوڑا ہے جس کی زبان"اوہٹ"تھی۔ اس کے علاوہ انھوں نے یہ بھی ثابت کیا ہے کہ اردو کا رشتہ گجری زبان سےہے جو نہ صرف گجرات، یا کشمیر اور پنجاب میں بولی جاتی تھی بلکہ اسکا رشتہ وسط ایشیا تک پھیلا ہوا تھا،اس کتاب میں محمد حسن نےپہلی مرتبہ اردو کا رشتہ غیر مسلم سنتوں اور ادیبوں سے بھی جوڑا ہے۔ کتاب میں تفصیلات سے گریز کیا گیا ہے جبکہ کس دور میں کس صنف سے کیا چیز لوگوں کو حاصل ہوئی اس پر بحث کی گئی ہے۔ یہ کتاب دو حصوں میں تقسیم کی گئی ہے پہلے حصے میں اردو کی تاریخ بیان کی گئی ہے جبکہ دوسرے حصے میں اردو ادب کی اصناف کو تاریخ کے تناظر میں دیکھا گیا ہے۔