سفر نامہ واحد صنف سخن ہے جس میں تخلیق کار اپنے معاشرے کا نہیں بلکہ دور کے معاشرے کو دنیا کے سامنے لاتا ہے ۔ اس میں جغرافیہ ، سیاست ، اہم شخصیات ، تہذیب ، مذہب ، رسومات و رواج سب کا ذکر ہوتا ہے ۔ ابن بطوطہ کا سفر نا مہ دنیا میں سب سے زیادہ مشہور ہے ۔انہوں نے اس زمانہ میں سفر کیا جب مشین کا کوئی تصو ر نہیں تھا اور نہ ہی مشینی مواصلات تھے ۔ انہوں نے ایک دو بر س سفر نہیں کیے بلکہ ملک در ملک پچیس سال سفرمیں رہے ۔عرب ممالک کی خاک چھانی ، فارس و روس کے ماتحت آنے والے ممالک میں زندگی گزاری ، تر کی سے منسلک ممالک کی سیاحی کی ، ہندو ستان کی جانب رخ کیا تو یہاں محمد تغلق نے اسے ہاتھوں ہاتھ لیا اور قضا کے عہدہ سے نوازا اورسلطان کے پسندید ہ فرد بن کر ہندوستان کے اہم شہروں کا سفر کیا ۔ پھر سلطان کا سفیر بن کر چین جانا ہوا اور خاقان چین سے ملاقات ہوئی پھر وہاں سے ہندوستان واپسی ہوئی پھر جنوب ہند کاسفر کیا پھر وہاں سے سری لنکا ہوتے ہوئے افریقہ نکلا اور پچاس سال کی عمر میں واپس وطن پہنچا۔ ابن بطوطہ کی شناخت پوری دنیا میں اس کتاب کی وجہ سے ہے ۔ اس کتاب کو انہوں نے عربی میں لکھا ہے جس کا ترجمہ دنیا کی مختلف زبانوں میں شائع ہوا ۔ اس کتاب میں انہوں نے اپنی ذات کابھی بر ملااظہار کیا ہے اس سے ان کی ایمانداری کا بھی پتہ چلتا ہے ۔

سیاح اور مورخ، ابوعبداللہ محمد ابن بطوطہ مکمل نام ہے۔ مراکش کے شہر طنجہ میں پیدا ہوا۔ ادب، تاریخ اور جغرافیہ کی تعلیم حاصل کرنے کے بعد اکیس سال کی عمر میں پہلا حج کیا۔ اس کے بعد شوق سیاحت نے افریقہ کے علاوہ روس سے ترکی پہنچا یا۔ جزائر شرق الہند اور چین کی سیاحت کی۔ عرب، ایران، شام، فلسطین، افغانستان اور ہندوستان کی سیاحت کی۔ چار بار حج بیت اللہ سے مشرف ہوا۔ محمد بن تغلق کے عہد میں ہندوستان آیا تھا۔ سلطان نے اُس کی بڑی آؤ بھگت کی اور قاضی کے عہدے پر سرفراز کیا۔ یہیں سے ایک سفارتی مشن پر چین جانے کا حکم ملا۔ 28 سال کی مدت میں اس نے 75 ہزار میل کاسفر کیا۔ آخر میں فارس کے بادشاہ ابوحنان کی دربار میں آیا۔ اور اس کے کہنے پر اپنے سفر نامے کو کتابی شکل دی۔ اس کتاب کا نام عجائب الاسفارنی غرائب الدیار ہے۔ یہ کتاب مختلف ممالک کے تاریخی و جغرافیائی حالات کا مجموعہ ہے۔