گیتا کا یہ اردو ترجمہ ہے ۔ اگرچہ گیتا کے تمام زبانوں میں ترجمے ہو چکے ہیں اور اسے سب سے پہلے فارسی نظم کا جامہ فیضی فیاضی نے پہنایا تھا۔ یہ ترجمہ اس لئے کیا گیا کیوں کہ بہت سے اردو کے قاری جو سنسکترت ،ہندی نہیں سمجھ سکتے مگر یہ چاہتے ہیں کہ وہ ہندو مت اور خاص طور پر شری کرشن کے اپدیشوں کو پڑھیں اور اس سے گیان حاصل کریں ۔ ان لوگوں کے لئے ایک نایاب تحفہ ہے یہ ترجمہ ۔ اس میں کورو اور پانڈو کی داستان پھر ان کی آپس میں لڑائی اور ارجن تیر انداز کا کرشن جی کا ساتھ دینا کو کانڈوں کے ذریعہ بیان کیا گیا ہے۔ خاص طور پر کرشن جی کے وہ اپدیش جو اس وقت ارجن کو دئے گئے تھے جب ارجن میدان جنگ چھوڑ کر بھاگ جانا چاہتے تھے ان کو پڑھ کر انسان پر بہت سے علوم کے درازے وا ہو جاتے ہیں اور وہ ظالم نہ بن کر پرشرمی بن جاتا ہے ۔دراصل میدان جنگ میں کرشن جی اور ارجن کی گفتگو ہی پوری گیتا کی روح ہے، جہاں سے دنیا و حیات کے قیمتی فلسفے کے سوتے پھوٹتے ہیں، ایک طرح سے مہابھارت کا یہ ایک جز یا ایک منظر ہے۔ اس کی تقدیس اور مقبولیت کے پیش نظر اردو میں کئی لوگوں نے الگ الگ اس کے تراجم کرکے اپنے اپنے اعتبار معنی و مفاہیم نکالے ہیں۔زیر نظر ترجمہ تین حصوں پر مشتمل ہے، پہلے حصے میں گیتا کے معنی و مفاہیم اور زمانہ تکمیل کا ذکر ہے جبکہ دوسرے حصے میں مختلف ابواب کے تحت گیتا کی تعبیر و تشریح کی گئی ہے، اور تیسرے حصہ میں گیتا کے مختلف تراجم پر بات کی گئی ہے۔یہ سب کارنامہ ڈاکٹر اجے مولوی نے انجام دیا ہے۔

ڈاکٹر اجے مالوی اردو کے ایک ایسے ادیب ہیں، جنہوں نے اردو میں ہندو مذہب کو پیش کیا ہے۔ وہ الہ آباد کے قدیم تعلیمی ادارے اینگلو بنگالی کالج کے شعبہ اردو کے سر براہ ہیں۔ ان کا تعلق عظیم مجاہد آزادی پنڈت مدن موہن مالوی کے خانوادے سے ہے۔