پٹنا سٹی کے محلہ تارنی پرساد لین ہندوستان سے تعلق رکھنے والی عصر حاضر کی معروف ادیبہ و شاعرہ اور افسانہ نگار فریدہ انجم صاحبہ 25 مئی 1995میں پیدا ہوئیں ۔ انہوں نے بی اے تک تعلیم حاصل کی ۔ ان کو بچپن سے ہی شعر و ادب سے دلچسپی تھی اس لیئے انہوں نے 8 سال کی عمر سے اپنے پسندیدہ ادباء اور شعراء کے اشعار، مضامین اور لطیفے لکھنا شروع کر دیے تاہم انہوں نے کافی عرصہ بعد 21 سال کی عمر میں 2016 سے اپنی شاعری کا آغاز کیا ۔ فریدہ انجم نے دبستان داغ کے نامور شاعر حضرت گوہر شیخ پوروی اور دبستان غالب کے منجھے ہوئے شاعر شوکت محمود شوکت کی شاگردی اختیار کی ۔ فریدہ انجم صاحبہ شاعری کے ساتھ ساتھ مضمون نویسی اور افسانہ نگاری بھی کر رہی ہیں ۔ ان کی شاعری، مضامین اور افسانے ہندوستان کے مختلف اخبارات اور رسائل و غیرہ میں شایع ہوتی رہتی ہیں ۔ شاعری میں فریدہ انجم غزل، نظم، رباعی اور قطعات نگاری کی اصناف میں بھرپور طبع آزمائی کر رہی ہیں ۔ ان کے اب تک 2 شعری مجموعے شایع ہو چکے ہیں جن میں " شعاع انجم " اور " قطعات انجم " شامل ہیں ۔ فریدہ انجم کو متعدد ادبی اعزازات اور ایوارڈز سے نوازا گیا ہے جن میں اکبر رضا جمشید اردو زبان و ادب ایوارڈ و دیگر شامل ہیں ۔