سر سید احمد خاں مصلح قوم اور اردو ادب کے عظیم محسن ہیں۔ سر سید کی سیاسی ، سماجی اورمذہبی ، تہذیبی اور تعلیمی کوششوں کے نتیجے میں اردو شعر و ادب کو ایک نئی جہت ملی۔اس نئی جہت کی تبلیغ و ترسیل اور تشہیر ادبی و تہذیبی رسائل کے ذریعے تندہی سے کی گئی۔محمڈن ایجوکیشنل کانفرنس ، سائنٹفک سوسائٹی ، ایم۔اے۔او کالج اور رسالہ تہذیب الاخلاق کے علم برداروں نے تخلیق اور تحریر و تصنیف کی سطح پر اردو زبان و ادب کو ترقی دی .سر سید ہی کی بدولت اردو اس قابل ہوئی کہ عشق و عاشقی کے دائرہ سے نکل کر ملکی ، سیاسی ، اخلاقی ، تاریخی ہر قسم کے مضامین سادگی اور صفائی سے ادا کر سکتی ہے. قمر الہدی فریدی کی زیر نظر کتاب "سر سید اور اردو زبان و ادب " سر احمد خان کی اردو زبان و ادب کی خدمات کا جائزہ ہے ، اس کتاب میں سر سید اور ان کے رفقاء کی وجہ سے اردو زبان و ادب میں جو واضح تبدیلیاں ہوئیں ان کاتذکرہ ہے ، ساتھ ہی ساتھ سر سید کے اسلوب نگارش ، سر سید کا تصور شعر وادب ، سائنٹفک سوسائٹی کے احوالو کوائف ، اور سائنٹفک سو سائیٹی کا اردو زبان و ادب میں کردار وغیرہ جیسے موضوعات پر بحث کی گئی ہے ، آخر میں سر سید کی صحافتی خدمات کا جائزہ بھی پیش کیا گیا ہے۔