زیر نظر کتاب الطاف حسین حالی کی شخصیت اور خدمات کا احاطہ کرنے والی نہایت عمدہ کتاب ہے۔ جس کو انہیں کی نواسی صالحہ عابد حسین نے نہایت جانفشانی سے ترتیب دیا ہے۔ کتاب کا پیش لفظ مولانا ابولکلام آزاد نے لکھا ہے۔ کتاب میں مولانا حالی کی نشو و نما سے لے کر بچپن میں ان کی ذہنی بیداری، ادبی اور قومی خدمات کے علاوہ شعر و شاعری میں ان کی انفرادیت کو "برگ و بار" کے عنوان سے محققانہ انداز میں پیش کیا گیا ہے۔ جس کے تحت مولانا کی مشہور نظم کی کتاب "مسدس حالی" کا تذکرہ مستقل عنوان کے تحت کیا گیا ہے۔ کتاب میں سرسید سے دلچسپ ملاقات کا ذکر بڑے خوبصورت انداز میں کیا گیا ہے۔ اس کے علاوہ حالی کی مثنویاں اور دوسری نظموں پر دقیق بحث، نیز رباعیات ،مرثیہ، قصیدہ ، نعت اور نثر نگاری میں ان کی قوت تحریر کو بتایا گیا ہے۔ کتاب میں مکتوبات حالی، حالی کی دریافت: غالب" انتہائی دلچسپ عنوانات ہیں جنہیں پڑھنے کے بعد قاری مولانا حالی کی مردم شناسی کی صفت کا اعتراف کئے بنا نہیں رہ سکتا۔