aap aae to KHayal-e-dil-e-nashad aaya

aap aa.e to ḳhayāl-e-dil-e-nāshād aayā

kitne bhūle hue zaḳhmoñ kā patā yaad aayā

aap ke lab pe kabhī apnā bhī naam aayā thā

shoḳh nazroñ se mohabbat kā salām aayā thā

umr bhar saath nibhāne kā payām aayā thā

aap ko dekh ke vo ahd-e-vafā yaad aayā

ruuh meñ jal uThe bujhtī huī yādoñ ke diye

kaise dīvāne the ham aap ko paane ke liye

yuuñ to kuchh kam nahīñ jo aap ne ehsān kiye

par jo māñge se na paayā vo sila yaad aayā

aaj vo baat nahīñ phir bhī koī baat nahīñ

mere hisse meñ ye halkī sī mulāqāt to hai

ġhair kā ho ke bhī ye husn mire saath to hai

haa.e kis vaqt mujhe kab kā gilā yaad aayā

aap aae to KHayal-e-dil-e-nashad aaya

kitne bhule hue zaKHmon ka pata yaad aaya

aap ke lab pe kabhi apna bhi nam aaya tha

shoKH nazron se mohabbat ka salam aaya tha

umr bhar sath nibhane ka payam aaya tha

aap ko dekh ke wo ahd-e-wafa yaad aaya

ruh mein jal uThe bujhti hui yaadon ke diye

kaise diwane the hum aap ko pane ke liye

yun to kuchh kam nahin jo aap ne ehsan kiye

par jo mange se na paya wo sila yaad aaya

aaj wo baat nahin phir bhi koi baat nahin

mere hisse mein ye halki si mulaqat to hai

ghair ka ho ke bhi ye husn mere sath to hai

hae kis waqt mujhe kab ka gila yaad aaya