bhul sakta hai bhala kaun ye pyari aankhen

bhuul saktā hai bhalā kaun ye pyārī āñkheñ

rang meñ Duubī huī niiñd se bhārī āñkheñ

mirī har soch ne har saañs ne chāhā hai tumheñ

jab se dekhā hai tumheñ tab se sarāhā hai tumheñ

bas ga.ī haiñ mirī āñkhoñ meñ tumhārī āñkheñ

tum jo nazroñ ko uThāo to sitāre jhuk jaa.eñ

tum jo palkoñ ko jhukāo to zamāne ruk jaa.eñ

kyuuñ na ban jaa.eñ un āñkhoñ kī pujārī āñkheñ

jāgtī rātoñ ko sapnoñ kā ḳhazāna mil jaa.e

tum jo mil jaao to jiine kā bahāna mil jaa.e

apnī qismat pe kareñ naaz hamārī āñkheñ

bhul sakta hai bhala kaun ye pyari aankhen

rang mein Dubi hui nind se bhaari aankhen

meri har soch ne har sans ne chaha hai tumhein

jab se dekha hai tumhein tab se saraha hai tumhein

bas gai hain meri aankhon mein tumhaari aankhen

tum jo nazron ko uThao to sitare jhuk jaen

tum jo palkon ko jhukao to zamane ruk jaen

kyun na ban jaen un aankhon ki pujari aankhen

jagti raaton ko sapnon ka KHazana mil jae

tum jo mil jao to jine ka bahana mil jae

apni qismat pe karen naz hamari aankhen