zindagi-bhar nahin bhulegi wo barsat ki raat

zindagī-bhar nahīñ bhūlegī vo barsāt kī raat

ek anjān hasīna se mulāqāt kī raat

haa.e vo reshmīñ zulfoñ se barastā paanī

phuul se gāloñ pe rukne ko tarastā paanī

dil meñ tūfān uThā.e hue jazbāt kī raat

zindagī-bhar nahīñ bhūlegī vo barsāt kī raat

Dar ke bijlī se achānak vo lipaTnā us kā

aur phir sharm se bal khā ke simaTnā us kā

kabhī dekhī na sunī aisī tilismāt kī raat

zindagī-bhar nahīñ bhūlegī vo barsāt kī raat

surḳh āñchal ko dabā kar jo nichoḌā us ne

dil pe jaltā huā ik terā sā chhoḌā us ne

aag paanī meñ lagāte hue hālāt kī raat

zindagī-bhar nahīñ bhūlegī vo barsāt kī raat

mere naġhmoñ meñ jo bastī hai vo tasvīr thī vo

naujavānī ke hasīñ ḳhvāb kī ta.abīr thī vo

āsmānoñ se utar aa.ī thī jo raat kī raat

zindagī-bhar nahīñ bhūlegī vo barsāt kī raat

zindagi-bhar nahin bhulegi wo barsat ki raat

ek anjaan hasina se mulaqat ki raat

hae wo reshmin zulfon se barasta pani

phul se galon pe rukne ko tarasta pani

dil mein tufan uThae hue jazbaat ki raat

zindagi-bhar nahin bhulegi wo barsat ki raat

Dar ke bijli se achanak wo lipaTna us ka

aur phir sharm se bal kha ke simaTna us ka

kabhi dekhi na suni aisi tilismat ki raat

zindagi-bhar nahin bhulegi wo barsat ki raat

surKH aanchal ko daba kar jo nichoDa us ne

dil pe jalta hua ek tera sa chhoDa us ne

aag pani mein lagate hue haalat ki raat

zindagi-bhar nahin bhulegi wo barsat ki raat

mere naghmon mein jo basti hai wo taswir thi wo

naujawani ke hasin KHwab ki tabir thi wo

aasmanon se utar aai thi jo raat ki raat

zindagi-bhar nahin bhulegi wo barsat ki raat