وہ ہم سفر تھا مگر اس سے ہم نوائی نہ تھی
دلچسپ معلومات
یہ غزل 1971 میں سقوط ڈھاکہ کے بعد لکھی گئی، جو نصیر ترابی کے گہرے جذباتی ردعمل کی عکاسی کرتی ہے۔ جب وہ اپنے دفتر میں تھے اور یہ المناک خبر سنی، تو غم سے نڈھال ہو کر انہوں نے اپنے احساسات کو اس دل گداز تخلیق میں سمو دیا۔ اس غزل کے اشعار مشرقی پاکستان کی علیحدگی پر گہرے دکھ اور افسوس کو بیان کرتے ہیں، جو ایک عام پاکستانی کے جذبات کی ترجمانی کرتے ہیں۔ اسے اس المیے کے سب سے مؤثر اظہار میں شمار کیا جاتا ہے اور مختلف گلوکاروں نے اسے اپنی آواز میں پیش کیا ہے۔ یہ غزل پاکستانی ڈرامہ ہمسفر میں بھی شامل کی گئی، جس میں فواد خان نے مرکزی کردار ادا کیا تھا۔
وہ ہم سفر تھا مگر اس سے ہم نوائی نہ تھی
کہ دھوپ چھاؤں کا عالم رہا جدائی نہ تھی
نہ اپنا رنج نہ اوروں کا دکھ نہ تیرا ملال
شب فراق کبھی ہم نے یوں گنوائی نہ تھی
محبتوں کا سفر اس طرح بھی گزرا تھا
شکستہ دل تھے مسافر شکستہ پائی نہ تھی
عداوتیں تھیں، تغافل تھا، رنجشیں تھیں بہت
بچھڑنے والے میں سب کچھ تھا، بے وفائی نہ تھی
بچھڑتے وقت ان آنکھوں میں تھی ہماری غزل
غزل بھی وہ جو کسی کو ابھی سنائی نہ تھی
کسے پکار رہا تھا وہ ڈوبتا ہوا دن
صدا تو آئی تھی لیکن کوئی دہائی نہ تھی
کبھی یہ حال کہ دونوں میں یک دلی تھی بہت
کبھی یہ مرحلہ جیسے کہ آشنائی نہ تھی
عجیب ہوتی ہے راہ سخن بھی دیکھ نصیرؔ
وہاں بھی آ گئے آخر، جہاں رسائی نہ تھی
یہ متن درج ذیل زمرے میں بھی شامل ہے
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
