ye dekhen raaz-e-dil ab kaun karta hai ayan pahle

ye dekheñ rāz-e-dil ab kaun kartā hai ayaañ pahle

nazar kartī hai iz.hār-e-mohabbat yā zabāñ pahle

agar ho dekhnā maqsūd barbādī kā nazzāra

jilā kar dekhiye ik baar apnā āshiyāñ pahle

pahuñch kar manzil-e-hastī pe ye ehsās hotā hai

ki guzre haiñ yahāñ se aur bhī kuchh kārvāñ pahle

ka.ī ma.asūm kaliyāñ jo abhī khilne na paa.ī huuñ

masal dete haiñ apne haath se ḳhud bāġhbāñ pahle

Thahar ai gardish-e-ayyām ham bhī saath chalte haiñ

uThā lene de faiz-e-sohbat-e-pīr-e-muġhāñ pahle

ye dekhen raaz-e-dil ab kaun karta hai ayan pahle

nazar karti hai izhaar-e-mohabbat ya zaban pahle

agar ho dekhna maqsud barbaadi ka nazzara

jila kar dekhiye ek bar apna aashiyan pahle

pahunch kar manzil-e-hasti pe ye ehsas hota hai

ki guzre hain yahan se aur bhi kuchh karwan pahle

kai masum kaliyan jo abhi khilne na pai hun

masal dete hain apne hath se KHud baghban pahle

Thahar ai gardish-e-ayyam hum bhi sath chalte hain

uTha lene de faiz-e-sohbat-e-pir-e-mughan pahle