aa apne dil mein meri tamanna liye hue

aa apne dil meñ merī tamannā liye hue

shauq-e-kalām o zauq-e-tamāshā liye hue

dil le ke ḳhud ko rahte haiñ kyā kyā liye hue

shīshe vahī to haiñ mirī duniyā liye hue

mahrūmiyoñ pe dil kī miTā jā rahā huuñ maiñ

hai ḳhaak terā naqsh-e-kaf-e-pā liye hue

tārīki-e-fazā kā shikāyat-guzār huuñ

siine meñ āftāb-e-suvaidā liye hue

pahle mire sahāre pe thā kār-o-bār-e-zīst

ab maiñ huuñ zindagī kā sahārā liye hue

jī chāhtā hai umr-e-mohabbat na ḳhatm ho

mar jā.iye kisī kī tamannā liye hue

apnā vaqār-e-ishq kabhī aazmā ke dekh

hogī jabīn-e-husn bhī sajda liye hue

ḳhush huuñ ki jaise god meñ hai lāl-e-shab-charāġh

dāman meñ apne lāla-e-sahrā liye hue

nāsh-e-ravāñ huuñ ziist hai merī fareb-e-zīst

phirtā huuñ zindagī kā janāza liye hue

josh-e-junūñ meñ ālam-vāraftagī na pūchh

sahrā se ham guzar ga.e sahrā liye hue

sar un ke āstāñ pe jo pahuñche to ho yaqīñ

saudā liye hue hai ki sajda liye hue

ham tuur par ga.e bhī to is shaan se ga.e

muusā khaḌe rahe yad-e-baizā liye hue

ai husn mere haal meñ tū bhī sharīk ho

donoñ jahāñ kā baar huuñ tanhā liye hue

be-parda be-ta.ayyun o be-nām dekh use

vo to hai sirf naam kā pardā liye hue

'sīmāb' qadr-dāñ haiñ mire ḳhān-e-jānsaTh

hāzir huā huuñ fikr kā hadiyā liye hue

aa apne dil mein meri tamanna liye hue

shauq-e-kalam o zauq-e-tamasha liye hue

dil le ke KHud ko rahte hain kya kya liye hue

shishe wahi to hain meri duniya liye hue

mahrumiyon pe dil ki miTa ja raha hun main

hai KHak tera naqsh-e-kaf-e-pa liye hue

tariki-e-faza ka shikayat-guzar hun

sine mein aaftab-e-suwaida liye hue

pahle mere sahaare pe tha kar-o-bar-e-zist

ab main hun zindagi ka sahaara liye hue

ji chahta hai umr-e-mohabbat na KHatm ho

mar jaiye kisi ki tamanna liye hue

apna waqar-e-ishq kabhi aazma ke dekh

hogi jabin-e-husn bhi sajda liye hue

KHush hun ki jaise god mein hai lal-e-shab-charagh

daman mein apne lala-e-sahra liye hue

nash-e-rawan hun zist hai meri fareb-e-zist

phirta hun zindagi ka janaza liye hue

josh-e-junun mein aalam-waraftagi na puchh

sahra se hum guzar gae sahra liye hue

sar un ke aastan pe jo pahunche to ho yaqin

sauda liye hue hai ki sajda liye hue

hum tur par gae bhi to is shan se gae

musa khaDe rahe yad-e-baiza liye hue

ai husn mere haal mein tu bhi sharik ho

donon jahan ka bar hun tanha liye hue

be-parda be-tayyun o be-nam dekh use

wo to hai sirf nam ka parda liye hue

'simab' qadr-dan hain mere KHan-e-jaansaTh

hazir hua hun fikr ka hadiya liye hue