aa gae phir tere arman miTane hum ko

aa ga.e phir tire armān miTāne ham ko

dil se pahle ye lagā deñge Thikāne ham ko

sar uThāne na diyā hashr ke din bhī zālim

kuchh tire ḳhauf ne kuchh apnī vafā ne ham ko

kuchh to hai zikr se dushman ke jo sharmāte haiñ

vahm meñ Daal diyā un kī hayā ne ham ko

zulm kā shauq bhī hai sharm bhī hai ḳhauf bhī hai

ḳhvāb meñ chhup ke vo aate haiñ satāne ham ko

chaar dāġhoñ pe na ehsān jatāo itnā

kaun se baḳhsh diye tum ne ḳhazāne ham ko

baat karne kī kahāñ vasl meñ fursat 'beḳhud'

vo to dete hī nahīñ hosh meñ aane ham ko

aa gae phir tere arman miTane hum ko

dil se pahle ye laga denge Thikane hum ko

sar uThane na diya hashr ke din bhi zalim

kuchh tere KHauf ne kuchh apni wafa ne hum ko

kuchh to hai zikr se dushman ke jo sharmate hain

wahm mein Dal diya un ki haya ne hum ko

zulm ka shauq bhi hai sharm bhi hai KHauf bhi hai

KHwab mein chhup ke wo aate hain satane hum ko

chaar daghon pe na ehsan jatao itna

kaun se baKHsh diye tum ne KHazane hum ko

baat karne ki kahan wasl mein fursat 'beKHud'

wo to dete hi nahin hosh mein aane hum ko