aa gai dil ki lagi baDh ke rag-e-jaan ke qarib

aa ga.ī dil kī lagī baḌh ke rag-e-jāñ ke qarīb

qāfila shauq kā hai manzil-e-armāñ ke qarīb

ādamiyyat nahīñ phaTkī tire darbāñ ke qarīb

varna aatā to hai insān hī insāñ ke qarīb

vaz-e-pābandī o āzādī-e-hastī tauba

ya.anī zindāñ se kahīñ duur na zindāñ ke qarīb

jur.at-e-afzā-e-savāl ai zahe andāz-e-javāb

aatī jaatī hai ab us but kī nahīñ haañ ke qarīb

hai to kuchh hashr kī aamad kā hameñ bhī khaTkā

is ke āsār to haiñ ganj-e-shahīdāñ ke qarīb

mujh ko ma.alūm huā ab ki zamāna tum ho

mil ga.ī rāh-e-sukūñ gardish-e-daurāñ ke qarīb

ġham-o-andoh kā lashkar bhī chalā aatā hai

ek ghoḌ-dauḌ sī hai umr-e-gurezāñ ke qarīb

girya-e-ġham ko hai palkoñ kā ishāra darkār

ek umDā huā tūfān hai mizhgāñ ke qarīb

jaan kis kis ko sambhāle ki sab ajzā-e-vajūd

haiñ pareshāni-e-ḳhātir se pareshāñ ke qarīb

paañv dāman se ulajhte haiñ ḳhudā ḳhair kare

haath rahte haiñ ka.ī din se garebāñ ke qarīb

bhuul jā ḳhud ko ki hai ma.arifat-e-nafs yahī

koī rahtā hī nahīñ sarhad-e-irfāñ ke qarīb

kasrat-e-ḳhār rah-e-shauq ilāhī tauba

kahīñ pahuñche to nahīñ rauza-e-rizvāñ ke qarīb

marhabā bandagī-āmoz tasavvur terā

jis ke ehsān se pahuñchā huuñ maiñ ehsāñ ke qarīb

tuur kī chheḌ huī hosh-rubā varna kalīm

koī pahuñchā bhī to thā sho.ala-e-uryāñ ke qarīb

qadr-afzā.ī-e-māhaul-e-vatan kyā kahnā

daam yūsuf ke bahut aa ga.e kan.āñ ke qarīb

ab to 'nātiq' kā bas itnā hī patā chaltā hai

hai kahīñ ghar se bahut duur bayābāñ ke qarīb

aa gai dil ki lagi baDh ke rag-e-jaan ke qarib

qafila shauq ka hai manzil-e-arman ke qarib

aadamiyyat nahin phaTki tere darban ke qarib

warna aata to hai insan hi insan ke qarib

waz-e-pabandi o aazadi-e-hasti tauba

yani zindan se kahin dur na zindan ke qarib

jurat-e-afza-e-sawal ai zahe andaz-e-jawab

aati jati hai ab us but ki nahin han ke qarib

hai to kuchh hashr ki aamad ka hamein bhi khaTka

is ke aasar to hain ganj-e-shahidan ke qarib

mujh ko malum hua ab ki zamana tum ho

mil gai rah-e-sukun gardish-e-dauran ke qarib

gham-o-andoh ka lashkar bhi chala aata hai

ek ghoD-dauD si hai umr-e-gurezan ke qarib

girya-e-gham ko hai palkon ka ishaara darkar

ek umDa hua tufan hai mizhgan ke qarib

jaan kis kis ko sambhaale ki sab ajza-e-wajud

hain pareshani-e-KHatir se pareshan ke qarib

panw daman se ulajhte hain KHuda KHair kare

hath rahte hain kai din se gareban ke qarib

bhul ja KHud ko ki hai marifat-e-nafs yahi

koi rahta hi nahin sarhad-e-irfan ke qarib

kasrat-e-KHar rah-e-shauq ilahi tauba

kahin pahunche to nahin rauza-e-rizwan ke qarib

marhaba bandagi-amoz tasawwur tera

jis ke ehsan se pahuncha hun main ehsan ke qarib

tur ki chheD hui hosh-ruba warna kalim

koi pahuncha bhi to tha shoala-e-uryan ke qarib

qadr-afzai-e-mahaul-e-watan kya kahna

dam yusuf ke bahut aa gae kanan ke qarib

ab to 'natiq' ka bas itna hi pata chalta hai

hai kahin ghar se bahut dur bayaban ke qarib