aa gai fasl-e-nau-bahaar dasht mein wo hawa chali

aa ga.ī fasl-e-nau-bahār dasht meñ vo havā chalī

sar pe huā junūñ savār aql piyāda-pā chalī

baaġh se jab havā chalī mai-kade se ghaTā chalī

dil kī kalī khilā chalī dil kī lagī bujhā chalī

tū ne na aa ke diid kī baiTh ke ghar meñ iid kī

laash tire shahīd kī jānib-e-karbalā chalī

vaah re daura-e-sharāb ḳhān-qaheñ huiiñ ḳharāb

jhuum rahe haiñ shaiḳh-o-shāb ab kī ajab havā chalī

shor uThā jo aah kā sabr-o-qarār uḌ chalā

qāfile meñ bajā dirā hone lagī chalā-chalī

sāqī-o-rind-e-bāda-kash aur pukāreñ al-atash

aate haiñ sab ko ġhash pe ġhash aaj sharāb kyā chalī

'qadr' ye fauj jab chaḌhī TūTegī qalb kī ghaḌī

naaz baḌhā adā baḌhī ġhamza chalā hayā chalī

aa gai fasl-e-nau-bahaar dasht mein wo hawa chali

sar pe hua junun sawar aql piyaada-pa chali

bagh se jab hawa chali mai-kade se ghaTa chali

dil ki kali khila chali dil ki lagi bujha chali

tu ne na aa ke did ki baiTh ke ghar mein id ki

lash tere shahid ki jaanib-e-karbala chali

wah re daura-e-sharab KHan-qahen huin KHarab

jhum rahe hain shaiKH-o-shab ab ki ajab hawa chali

shor uTha jo aah ka sabr-o-qarar uD chala

qafile mein baja dira hone lagi chala-chali

saqi-o-rind-e-baada-kash aur pukaren al-atash

aate hain sab ko ghash pe ghash aaj sharab kya chali

'qadr' ye fauj jab chaDhi TuTegi qalb ki ghaDi

naz baDha ada baDhi ghamza chala haya chali