aa idhar aa hausla gar kuchh hai qatil aur bhi

aa idhar aa hausla gar kuchh hai qātil aur bhī

dekhtā jā shauq-e-vasl-e-rūh-e-bismil aur bhī

dekh kar maqtal meñ josh-e-ḳhūn-e-bismil aur bhī

chaḌh gayā ik dam dam-e-shamshīr-e-qātil aur bhī

jab se apnā ka.aba-e-dil jalva-gāh-e-yār hai

baḌh ga.ī hai āshiqoñ meñ azmat-e-dil aur bhī

chāhne vaalā tirā ik maiñ hī to tanhā nahīñ

shukr hai is jurm-e-ulfat meñ haiñ shāmil aur bhī

dekhiye phir kis tarah hotā nahīñ un par asar

kaash sun lete navā-e-parda-e-dil aur bhī

chashm-e-sāqī ho idhar bhī daur-e-jām-e-nigāh

haiñ darūn-e-ḳhāna-e-ulfat meñ haiñ shāmil aur bhī

maiñ to pahle hī se nazr-e-āsiyā-e-charḳh thā

ishq ne rakh dī mire siine pe ik sil aur bhī

maiñ to terā ho liyā tū bhī to ho merā kabhī

terī nazar-e-mehr ko takte haiñ 'bismil' aur bhī

aa idhar aa hausla gar kuchh hai qatil aur bhi

dekhta ja shauq-e-wasl-e-ruh-e-bismil aur bhi

dekh kar maqtal mein josh-e-KHun-e-bismil aur bhi

chaDh gaya ek dam dam-e-shamshir-e-qatil aur bhi

jab se apna kaba-e-dil jalwa-gah-e-yar hai

baDh gai hai aashiqon mein azmat-e-dil aur bhi

chahne wala tera ek main hi to tanha nahin

shukr hai is jurm-e-ulfat mein hain shamil aur bhi

dekhiye phir kis tarah hota nahin un par asar

kash sun lete nawa-e-parda-e-dil aur bhi

chashm-e-saqi ho idhar bhi daur-e-jam-e-nigah

hain darun-e-KHana-e-ulfat mein hain shamil aur bhi

main to pahle hi se nazr-e-asiya-e-charKH tha

ishq ne rakh di mere sine pe ek sil aur bhi

main to tera ho liya tu bhi to ho mera kabhi

teri nazar-e-mehr ko takte hain 'bismil' aur bhi