aa jaen hum nazar jo koi dam bahut hai yan

aa jaa.eñ ham nazar jo koī dam bahut hai yaañ

mohlat hameñ bisān-e-sharar kam bahut hai yaañ

yak lahza sīna-kūbī se fursat hameñ nahīñ

ya.anī ki dil ke jaane kā mātam bahut hai yaañ

hāsil hai kyā sivā.e tarā.ī ke dahr meñ

uTh āsmāñ tale se ki shabnam bahut hai yaañ

mā.il-ba-ġhair honā tujh abrū kā aib hai

thī zor ye kamāñ vale ḳham-cham bahut hai yaañ

ham rah-ravān-e-rāh-e-fanā der rah chuke

vaqfa bisān-e-sub.h koī dam bahut hai yaañ

is but-kade meñ ma.anī kā kis se kareñ savāl

aadam nahīñ hai sūrat-e-ādam bahut hai yaañ

aalam meñ log milne kī goñ ab nahīñ rahe

har-chand aisā vaisā to aalam bahut hai yaañ

vaisā chaman se saada nikaltā nahīñ koī

rañgīnī ek aur ḳham-o-cham bahut hai yaañ

ejāz-e-īsvī se nahīñ bahas ishq meñ

terī hī baat jaan mujassam bahut hai yaañ

mere halāk karne kā ġham hai abas tumheñ

tum shaad zindagānī karo ġham bahut hai yaañ

dil mat lagā ruḳh-e-araq-ālūd yaar se

ā.īne ko uThā ki zamīñ nam bahut hai yaañ

shāyad ki kaam sub.h tak apnā khiñche na 'mīr'

ahvāl aaj shaam se darham bahut hai yaañ

aa jaen hum nazar jo koi dam bahut hai yan

mohlat hamein bisan-e-sharar kam bahut hai yan

yak lahza sina-kubi se fursat hamein nahin

yani ki dil ke jaane ka matam bahut hai yan

hasil hai kya siwae tarai ke dahr mein

uTh aasman tale se ki shabnam bahut hai yan

mail-ba-ghair hona tujh abru ka aib hai

thi zor ye kaman wale KHam-cham bahut hai yan

hum rah-rawan-e-rah-e-fana der rah chuke

waqfa bisan-e-subh koi dam bahut hai yan

is but-kade mein mani ka kis se karen sawal

aadam nahin hai surat-e-adam bahut hai yan

aalam mein log milne ki gon ab nahin rahe

har-chand aisa waisa to aalam bahut hai yan

waisa chaman se sada nikalta nahin koi

rangini ek aur KHam-o-cham bahut hai yan

ejaz-e-iswi se nahin bahas ishq mein

teri hi baat jaan mujassam bahut hai yan

mere halak karne ka gham hai abas tumhein

tum shad zindagani karo gham bahut hai yan

dil mat laga ruKH-e-araq-alud yar se

aaine ko uTha ki zamin nam bahut hai yan

shayad ki kaam subh tak apna khinche na 'mir'

ahwal aaj sham se darham bahut hai yan