aa kar najat baKHsh do ranj-o-malal se

aa kar najāt baḳhsh do ranj-o-malāl se

dil mutma.in nahīñ hai tumhāre ḳhayāl se

uf gardish-e-nasīb ki hushyār ho ke bhī

mahfūz rah sake na zamāne kī chaal se

ye kyuuñ kahūñ ki mujh se unheñ pyaar hai magar

ik vāsta zarūr hai mere ḳhayāl se

thā kaun ye ḳhabar nahīñ bas itnā yaad hai

Takrā.ī thī nigāh kisī ke jamāl se

dil-bastagī kī us se koī kyā kare umiid

jo kheltā rahā ho dil-e-pā.emāl se

aisā na ho ki aise hī ban jaa.eñ aap bhī

mat kījiye gurez kisī ḳhasta-hāl se

jaatā rahegā 'shauq' taḌapne kā ab maza

ġham baḌh rahā hai aaj had-e-e'tidāl se

aa kar najat baKHsh do ranj-o-malal se

dil mutmain nahin hai tumhaare KHayal se

uf gardish-e-nasib ki hushyar ho ke bhi

mahfuz rah sake na zamane ki chaal se

ye kyun kahun ki mujh se unhen pyar hai magar

ek wasta zarur hai mere KHayal se

tha kaun ye KHabar nahin bas itna yaad hai

Takrai thi nigah kisi ke jamal se

dil-bastagi ki us se koi kya kare umid

jo khelta raha ho dil-e-paemal se

aisa na ho ki aise hi ban jaen aap bhi

mat kijiye gurez kisi KHasta-haal se

jata rahega 'shauq' taDapne ka ab maza

gham baDh raha hai aaj had-e-e'tidal se