aa ke ek bar mere yar zara dekh to le

aa ke ik baar mire yaar zarā dekh to le

chārāgar ḳhud bhī hai bīmār zarā dekh to le

din guzartā hai tire hijr meñ thoḌā thoḌā

gardish-e-vaqt kī ye maar zarā dekh to le

qalb-e-vārafta kī har aah bhī sahmī sahmī

dhīmī dhīmī sī hai raftār zarā dekh to le

ab bhī mahfūz haiñ āñkhoñ meñ vo saare manzar

vahī naḳhre vahī takrār zarā dekh to le

na samundar hai na sāhil na koī kashtī hai

kaise utregā vo us paar zarā dekh to le

tum ki har baat pe saḌkoñ pe utar aate ho

zañg-ālūda hai talvār zarā dekh to le

maiñ ki baiThā huuñ tire dar pe savālī ban kar

hoñge kitne hī giraftār zarā dekh to le

ham ki ḳhanjar se bhī do bāteñ kiyā karte haiñ

zaḳhm gahrā hai so talvār zarā dekh to le

aa ke ek bar mere yar zara dekh to le

chaaragar KHud bhi hai bimar zara dekh to le

din guzarta hai tere hijr mein thoDa thoDa

gardish-e-waqt ki ye mar zara dekh to le

qalb-e-warafta ki har aah bhi sahmi sahmi

dhimi dhimi si hai raftar zara dekh to le

ab bhi mahfuz hain aankhon mein wo sare manzar

wahi naKHre wahi takrar zara dekh to le

na samundar hai na sahil na koi kashti hai

kaise utrega wo us par zara dekh to le

tum ki har baat pe saDkon pe utar aate ho

zang-aluda hai talwar zara dekh to le

main ki baiTha hun tere dar pe sawali ban kar

honge kitne hi giraftar zara dekh to le

hum ki KHanjar se bhi do baaten kiya karte hain

zaKHm gahra hai so talwar zara dekh to le