aankhon mein murawwat teri ai yar kahan hai

āñkhoñ meñ muravvat tirī ai yaar kahāñ hai

pūchhā na kabhū mujh ko vo bīmār kahāñ hai

nau ḳhat to hazāroñ haiñ gulistān-e-jahāñ meñ

hai saaf to yuuñ tujh sā numūdār kahāñ hai

ārām mujhe sāya-e-tūbā meñ nahīñ hai

batlāo ki vo sāya-e-dīvār kahāñ hai

laao to lahū aaj piyūñ duḳhtar-e-raz kā

ai muhtasibo dekho vo murdār kahāñ hai

furqat meñ us abrū kī galā kāTūñgā apnā

myaañ diijo use dam mirī talvār kahāñ hai

jin se ki ho marbūt vahī tum ko hai maimūn

insān kī sohbat tumheñ darkār kahāñ hai

dekhūñ jo tujhe ḳhvāb meñ maiñ ai mah-e-kan.āñ

aisā to mirā tāla-e-bedār kahāñ hai

sunte hī us āvāz kī kuchh ho ga.ī vahshat

dekho to vo zanjīr kī jhankār kahāñ hai

din chhīne vo jab dekhiyo ġhārat-garī us kī

tab sochiyo ḳhurshīd kī dastār kahāñ hai

us din ke huuñ sadqe ki tū khīñche hue talvār

ye pūchhtā aave vo gunahgār kahāñ hai

hañste to ho tum mujh pe va-lekin koī din ko

ro.o.ge ki vo merā giraftār kahāñ hai

ai ġham mujhe yaañ ahl-e-ta.ayyush ne hai gherā

is bhiiḌ meñ tū ai mire ġham-ḳhvār kahāñ hai

jab tak ki vo jhāñke thā idhar mahr se ham to

vāqif hī na the mahr par anvār kahāñ hai

us mah ke sarakte hī ye andher hai 'ehsāñ'

mā'lūm nahīñ raḳhna-e-dīvār kahāñ hai

aankhon mein murawwat teri ai yar kahan hai

puchha na kabhu mujh ko wo bimar kahan hai

nau KHat to hazaron hain gulistan-e-jahan mein

hai saf to yun tujh sa numudar kahan hai

aaram mujhe saya-e-tuba mein nahin hai

batlao ki wo saya-e-diwar kahan hai

lao to lahu aaj piyun duKHtar-e-raz ka

ai muhtasibo dekho wo murdar kahan hai

furqat mein us abru ki gala kaTunga apna

myan dijo use dam meri talwar kahan hai

jin se ki ho marbut wahi tum ko hai maimun

insan ki sohbat tumhein darkar kahan hai

dekhun jo tujhe KHwab mein main ai mah-e-kanan

aisa to mera tala-e-bedar kahan hai

sunte hi us aawaz ki kuchh ho gai wahshat

dekho to wo zanjir ki jhankar kahan hai

din chhine wo jab dekhiyo ghaarat-gari us ki

tab sochiyo KHurshid ki dastar kahan hai

us din ke hun sadqe ki tu khinche hue talwar

ye puchhta aawe wo gunahgar kahan hai

hanste to ho tum mujh pe wa-lekin koi din ko

rooge ki wo mera giraftar kahan hai

ai gham mujhe yan ahl-e-tayyush ne hai ghera

is bhiD mein tu ai mere gham-KHwar kahan hai

jab tak ki wo jhanke tha idhar mahr se hum to

waqif hi na the mahr par anwar kahan hai

us mah ke sarakte hi ye andher hai 'ehsan'

ma'lum nahin raKHna-e-diwar kahan hai