aankhon pa abhi tohmat-e-binai kahan hai

āñkhoñ pa abhī tohmat-e-bīnā.ī kahāñ hai

tū ḳhud hī tamāsha hai tamāshā.ī kahāñ hai

ā.īna huī tishnagī pāyābī-e-jāñ se

chehre pa to likkhī hui rusvā.ī kahāñ hai

in jāgtī āñkhoñ ko mile dhuup ke bāzār

ai dil vo pighaltī hui tanhā.ī kahāñ hai

suraj hai ki bas nok pe suuī kī khaḌā hai

ab fursat-e-kam-kam bhī mire bhaa.ī kahāñ hai

ḳhuuñ chūste lamhoñ se kaho haath pasāreñ

ehsās kī sūrat abhī zardā.ī kahāñ hai

kuchh aur bikhar kar kahīñ pahchān na kho luuñ

is shahr ko miTī mirī raas aa.ī kahāñ hai

vo shaḳhs baḌe chaav se kuchh pūchh rahā hai

tū aise meñ ai lazzat-e-goyā.ī kahāñ hai

ḳhair apnoñ meñ ik ham hī nakul aa.e haiñ shā'ir

shahzādgī-e-shauq ye ābā.ī kahāñ hai

aankhon pa abhi tohmat-e-binai kahan hai

tu KHud hi tamasha hai tamashai kahan hai

aaina hui tishnagi payabi-e-jaan se

chehre pa to likkhi hui ruswai kahan hai

in jagti aankhon ko mile dhup ke bazar

ai dil wo pighalti hui tanhai kahan hai

suraj hai ki bas nok pe sui ki khaDa hai

ab fursat-e-kam-kam bhi mere bhai kahan hai

KHun chuste lamhon se kaho hath pasaren

ehsas ki surat abhi zardai kahan hai

kuchh aur bikhar kar kahin pahchan na kho lun

is shahr ko miTi meri ras aai kahan hai

wo shaKHs baDe chaw se kuchh puchh raha hai

tu aise mein ai lazzat-e-goyai kahan hai

KHair apnon mein ek hum hi nakul aae hain sha'ir

shahzadgi-e-shauq ye aabai kahan hai