aab-dar-ab mere sath safar karte hain

āb-dar-āb mire saath safar karte haiñ

tishna-lab ḳhvāb mire saath safar karte haiñ

dasht-e-ehsās tirī pyaas se maiñ haar gayā

varna sailāb mire saath safar karte haiñ

jānte haiñ ki mujhe niiñd nahīñ aatī hai

phir bhī kuchh ḳhvāb mire saath safar karte haiñ

ye batāte haiñ kahāñ baiThnā uThnā hai kahāñ

mere ādāb mire saath safar karte haiñ

ai samundar maiñ bachā.e hue phirtā huuñ tujhe

tere girdāb mire saath safar karte haiñ

ik siyah raat ta.āqub meñ lagī rahtī hai

najm-o-mahtāb mire saath safar karte haiñ

sach to ye hai ki nahīñ ek bhī sachchā in meñ

jitne alqāb mire saath safar karte haiñ

maiñ huuñ buniyād kā patthar tujhe ma.alūm nahīñ

tāq-o-mehrāb mire saath safar karte haiñ

kaun samjhegā in ashkoñ kī ibārat 'tāriq'

jin ke eraab mire saath safar karte haiñ

aab-dar-ab mere sath safar karte hain

tishna-lab KHwab mere sath safar karte hain

dasht-e-ehsas teri pyas se main haar gaya

warna sailab mere sath safar karte hain

jaante hain ki mujhe nind nahin aati hai

phir bhi kuchh KHwab mere sath safar karte hain

ye batate hain kahan baiThna uThna hai kahan

mere aadab mere sath safar karte hain

ai samundar main bachae hue phirta hun tujhe

tere girdab mere sath safar karte hain

ek siyah raat taaqub mein lagi rahti hai

najm-o-mahtab mere sath safar karte hain

sach to ye hai ki nahin ek bhi sachcha in mein

jitne alqab mere sath safar karte hain

main hun buniyaad ka patthar tujhe malum nahin

taq-o-mehrab mere sath safar karte hain

kaun samjhega in ashkon ki ibarat 'tariq'

jin ke erab mere sath safar karte hain