aabru kya KHak us gul ki ki gulshan mein nahin

aabrū kyā ḳhaak us gul kī ki gulshan meñ nahīñ

hai garebāñ nañg-e-pairāhan jo dāman meñ nahīñ

zof se ai girya kuchh baaqī mire tan meñ nahīñ

rañg ho kar uḌ gayā jo ḳhuuñ ki dāman meñ nahīñ

ho ga.e haiñ jamā ajzā-e-nigāh-e-āftāb

zarre us ke ghar kī dīvāroñ ke rauzan meñ nahīñ

kyā kahūñ tārīki-e-zindān-e-ġham andher hai

pamba nūr-e-sub.h se kam jis ke rauzan meñ nahīñ

raunaq-e-hastī hai ishq-e-ḳhāna vīrāñ saaz se

anjuman be-shamā hai gar barq ḳhirman meñ nahīñ

zaḳhm silvāne se mujh par chārā-juī kā hai taan

ġhair samjhā hai ki lazzat zaḳhm-e-sozan meñ nahīñ

bas-ki haiñ ham ik bahār-e-nāz ke maare hue

jalva-e-gul ke sivā gard apne madfan meñ nahīñ

qatra qatra ik hayūlā hai na.e nāsūr kā

ḳhuuñ bhī zauq-e-dard se fāriġh mire tan meñ nahīñ

le ga.ī saaqī kī naḳhvat qulzum-āshāmī mirī

mauj-e-mai kī aaj rag miinā kī gardan meñ nahīñ

ho fishār-e-zof meñ kyā nā-tavānī kī numūd

qad ke jhukne kī bhī gunjā.ish mire tan meñ nahīñ

thī vatan meñ shaan kyā 'ġhālib' ki ho ġhurbat meñ qadr

be-takalluf huuñ vo musht-e-ḳhas ki gulḳhan meñ nahīñ

aabru kya KHak us gul ki ki gulshan mein nahin

hai gareban nang-e-pairahan jo daman mein nahin

zof se ai girya kuchh baqi mere tan mein nahin

rang ho kar uD gaya jo KHun ki daman mein nahin

ho gae hain jama ajza-e-nigah-e-aftab

zarre us ke ghar ki diwaron ke rauzan mein nahin

kya kahun tariki-e-zindan-e-gham andher hai

pamba nur-e-subh se kam jis ke rauzan mein nahin

raunaq-e-hasti hai ishq-e-KHana viran saz se

anjuman be-shama hai gar barq KHirman mein nahin

zaKHm silwane se mujh par chaara-jui ka hai tan

ghair samjha hai ki lazzat zaKHm-e-sozan mein nahin

bas-ki hain hum ek bahaar-e-naz ke mare hue

jalwa-e-gul ke siwa gard apne madfan mein nahin

qatra qatra ek hayula hai nae nasur ka

KHun bhi zauq-e-dard se farigh mere tan mein nahin

le gai saqi ki naKHwat qulzum-ashami meri

mauj-e-mai ki aaj rag mina ki gardan mein nahin

ho fishaar-e-zof mein kya na-tawani ki numud

qad ke jhukne ki bhi gunjaish mere tan mein nahin

thi watan mein shan kya 'ghaalib' ki ho ghurbat mein qadr

be-takalluf hun wo musht-e-KHas ki gulKHan mein nahin