aae hain mir kafir ho kar KHuda ke ghar mein

aa.e haiñ 'mīr' kāfir ho kar ḳhudā ke ghar meñ

peshānī par hai qashqa zunnār hai kamar meñ

nāzuk badan hai kitnā vo shoḳh-chashm dilbar

jaan us ke tan ke aage aatī nahīñ nazar meñ

siine meñ tiir us ke TuuTe haiñ be-nihāyat

surāḳh paḌ ga.e haiñ saare mire jigar meñ

ā.inda shaam ko ham royā kuḌhā kareñge

mutlaq asar na dekhā nālīdan-e-sahar meñ

be-sudh paḌā rahūñ huuñ us mast-e-nāz bin maiñ

aatā hai hosh mujh ko ab to pahr pahr meñ

sīrat se guftugū hai kyā mo'tabar hai sūrat

hai ek sūkhī lakḌī jo bū na ho agar meñ

ham-sāya-e-muġhāñ meñ muddat se huuñ chunāñche

ik shīra-ḳhāne kī hai dīvār mere ghar meñ

ab sub.h o shaam shāyad girye pe rañg aave

rahtā hai kuchh jhamaktā ḳhūnāb chashm-e-tar meñ

aalam meñ āb-o-gil ke kyūñkar nibāh hogā

asbāb gir paḌā hai saarā mirā safar meñ

aae hain 'mir' kafir ho kar KHuda ke ghar mein

peshani par hai qashqa zunnar hai kamar mein

nazuk badan hai kitna wo shoKH-chashm dilbar

jaan us ke tan ke aage aati nahin nazar mein

sine mein tir us ke TuTe hain be-nihayat

suraKH paD gae hain sare mere jigar mein

aainda sham ko hum roya kuDha karenge

mutlaq asar na dekha nalidan-e-sahar mein

be-sudh paDa rahun hun us mast-e-naz bin main

aata hai hosh mujh ko ab to pahr pahr mein

sirat se guftugu hai kya mo'tabar hai surat

hai ek sukhi lakDi jo bu na ho agar mein

ham-saya-e-mughan mein muddat se hun chunanche

ek shira-KHane ki hai diwar mere ghar mein

ab subh o sham shayad girye pe rang aawe

rahta hai kuchh jhamakta KHunab chashm-e-tar mein

aalam mein aab-o-gil ke kyunkar nibah hoga

asbab gir paDa hai sara mera safar mein