aae hum ghaalib-o-iqbaal ke naghmat ke baad

aa.e ham 'ġhālib'-o-'iqbāl' ke naġhmāt ke ba.ad

'mus.haf'-e-ishq-o-junūñ husn kī āyāt ke ba.ad

ai vatan ḳhāk-e-vatan vo bhī tujhe de deñge

bach gayā hai jo lahū ab ke fasādāt ke ba.ad

nār-e-namrūd yahī aur yahī gulzār-e-ḳhalīl

koī ātish nahīñ ātish-kada-e-zāt ke ba.ad

rām-o-gautam kī zamīñ hurmat-e-insāñ kī amiiñ

bāñjh ho jā.egī kyā ḳhuun kī barsāt ke ba.ad

tishnagī hai ki bujhā.e nahīñ bujhtī 'sardār'

baḌh ga.ī kausar-o-tasnīm kī sauġhāt ke ba.ad

aae hum 'ghaalib'-o-'iqbaal' ke naghmat ke baad

'mushaf'-e-ishq-o-junun husn ki aayat ke baad

ai watan KHak-e-watan wo bhi tujhe de denge

bach gaya hai jo lahu ab ke fasadat ke baad

nar-e-namrud yahi aur yahi gulzar-e-KHalil

koi aatish nahin aatish-kada-e-zat ke baad

ram-o-gautam ki zamin hurmat-e-insan ki amin

banjh ho jaegi kya KHun ki barsat ke baad

tishnagi hai ki bujhae nahin bujhti 'sardar'

baDh gai kausar-o-tasnim ki saughat ke baad