aag dekhun kabhi jalta hua bistar dekhun

aag dekhūñ kabhī jaltā huā bistar dekhūñ

raat aa.e to yahīñ ḳhvāb-e-mukarrar dekhūñ

ek bechain samundar hai mire jism meñ qaid

TuuT jaa.e jo ye dīvār to manzar dekhūñ

raat gahrī hai bahut raaz na degī apnā

maiñ to sūraj bhī nahīñ huuñ ki utar kar dekhūñ

ḳhud pe kyā biit ga.ī itne dinoñ meñ tujh bin

ye bhī himmat nahīñ ab jhāñk ke andar dekhūñ

koī is daur meñ elān-e-nabūvat kartā

aarzū thī ki ḳhudā-sāz payambar dekhūñ

ek sannāTā huuñ patthar ke jigar meñ paivast

maiñ koī but to nahīñ huuñ ki nikal kar dekhūñ

yuuñ nashe se kabhī do chaar tirā ġham ho ki maiñ

band āñkhoñ se khulī aañkh kā manzar dekhūñ

oḌh kar ḳhaak 'mujībī' sunūñ dushnām-e-jahāñ

ye tamāshā hī kisī roz miyāñ kar dekhūñ

aag dekhun kabhi jalta hua bistar dekhun

raat aae to yahin KHwab-e-mukarrar dekhun

ek bechain samundar hai mere jism mein qaid

TuT jae jo ye diwar to manzar dekhun

raat gahri hai bahut raaz na degi apna

main to suraj bhi nahin hun ki utar kar dekhun

KHud pe kya bit gai itne dinon mein tujh bin

ye bhi himmat nahin ab jhank ke andar dekhun

koi is daur mein elan-e-nabuwat karta

aarzu thi ki KHuda-saz payambar dekhun

ek sannaTa hun patthar ke jigar mein paiwast

main koi but to nahin hun ki nikal kar dekhun

yun nashe se kabhi do chaar tera gham ho ki main

band aankhon se khuli aankh ka manzar dekhun

oDh kar KHak 'mujibi' sunun dushnam-e-jahan

ye tamasha hi kisi roz miyan kar dekhun