aag laga di pahle gulon ne bagh mein wo shadabi ki

aag lagā dī pahle guloñ ne baaġh meñ vo shādābī kī

aa.ī ḳhizāñ gulzār meñ jab gul-barg se gulḳhan-tābī kī

kunj-e-lahad meñ mujh ko sulā ke pūchhte haiñ vo logoñ se

niiñd unheñ ab aa ga.ī kyūñ-kar kyā huī jo bad-ḳhvābī kī

soch meñ haiñ kuchh paas nahīñ kis tarah adam tak pahuñcheñge

aa ke safar darpesh huā hai fikr hai be-asbābī kī

abr hai giryāñ kis ke liye malbūs siyah hai kyuuñ is kā

sog-nashīñ kis kā hai falak kyā vaj.h abā-e-ābī kī

zer-e-mahal us shoḳh ke jā ke paañv jo ham ne phailā.e

sharm-o-hayā ne uThne na dī chilman jo chhuTī mahtābī kī

dil kā Thikānā kyā maiñ batā.ūñ haal na is kā kuchh pūchho

duur karo hogā vo kahīñ galiyoñ meñ aur sa.ī har baabī kī

dil na huā pahle jo bismil loTne se kyā matlab thā

dhuum thī jab ḳhush-bāshiyoñ kī ab shohrat hai betābī kī

sham.oñ kā āḳhir haal ye pahuñchā sabr paḌā parvānoñ kā

kavve uThā ke le ga.e din ko paa.ī sazā sartābī kī

ġhunche ḳhajil haiñ zikr se us ke tañg dahan hai aisā us kā

naam huā unaqā-e-zamāna dhuum uḌī nāyābī kī

bajre lagā.e logoñ ne lā ke un ke barāmad hone ko

ashkoñ ne mere rāh-e-vafā meñ aaj to vo sailābī kī

ḳhat nahīñ paḌtā mere gale par tishna-e-hasrat martā huuñ

teġh tirī be-āb huī thiiñ ārzūeñ ḳhush-ābī kī

rahm hai lāzim tujh ko bhī gulchīñ dil na dukhā tū bulbul kā

nik.hat-e-gul ne us se kashish kī taab na thī betābī kī

naza.a meñ yā-rab ḳhanda-jabīñ huuñ ruuh jo nikle ḳhush nikle

pesh-e-nazar aa.eñ jo farishte sūrat ho ārābī kī

kalġhī kī jā par taaj meñ rakh le zauq rahe pā-bosī kā

paa.e agar bilqīs kahīñ tasvīr tirī gurgābī kī

paḌh ke vazīfa ishq kā us ke tum jo taḌap ke rote ho

ruuh na ho tahlīl 'sharaf' hasrat se kisī vahābī kī

aag laga di pahle gulon ne bagh mein wo shadabi ki

aai KHizan gulzar mein jab gul-barg se gulKHan-tabi ki

kunj-e-lahad mein mujh ko sula ke puchhte hain wo logon se

nind unhen ab aa gai kyun-kar kya hui jo bad-KHwabi ki

soch mein hain kuchh pas nahin kis tarah adam tak pahunchenge

aa ke safar darpesh hua hai fikr hai be-asbabi ki

abr hai giryan kis ke liye malbus siyah hai kyun is ka

sog-nashin kis ka hai falak kya wajh aba-e-abi ki

zer-e-mahal us shoKH ke ja ke panw jo hum ne phailae

sharm-o-haya ne uThne na di chilman jo chhuTi mahtabi ki

dil ka Thikana kya main bataun haal na is ka kuchh puchho

dur karo hoga wo kahin galiyon mein aur sai har babi ki

dil na hua pahle jo bismil loTne se kya matlab tha

dhum thi jab KHush-bashiyon ki ab shohrat hai betabi ki

shamon ka aaKHir haal ye pahuncha sabr paDa parwanon ka

kawwe uTha ke le gae din ko pai saza sartabi ki

ghunche KHajil hain zikr se us ke tang dahan hai aisa us ka

nam hua unaqa-e-zamana dhum uDi nayabi ki

bajre lagae logon ne la ke un ke baramad hone ko

ashkon ne mere rah-e-wafa mein aaj to wo sailabi ki

KHat nahin paDta mere gale par tishna-e-hasrat marta hun

tegh teri be-ab hui thin aarzuen KHush-abi ki

rahm hai lazim tujh ko bhi gulchin dil na dukha tu bulbul ka

nikhat-e-gul ne us se kashish ki tab na thi betabi ki

naza mein ya-rab KHanda-jabin hun ruh jo nikle KHush nikle

pesh-e-nazar aaen jo farishte surat ho aarabi ki

kalghi ki ja par taj mein rakh le zauq rahe pa-bosi ka

pae agar bilqis kahin taswir teri gurgabi ki

paDh ke wazifa ishq ka us ke tum jo taDap ke rote ho

ruh na ho tahlil 'sharaf' hasrat se kisi wahabi ki