aag sinon mein jala kar rakhiye

aag sīnoñ meñ jalā kar rakhiye

ḳhvāb āñkhoñ meñ basā kar rakhiye

rāhatoñ se lage sadme bhī haiñ

dil ko mazbūt banā kar rakhiye

iid kā din hai gale mil liije

iḳhtilāfāt haTā kar rakhiye

nafrateñ dil se nikal jā.eñgī

haath dushman se milā kar rakhiye

tāb-e-zanjīr nahīñ hai dil ko

zulf-e-pechāñ ko sajā kar rakhiye

yaad aa jā.egī dīvāne kī

phuul joḌe meñ lagā kar rakhiye

jaane vaalā na kabhī aa.egā

dil meñ yādoñ ko basā kar rakhiye

ishq kī aag hai muñh-zor 'salām'

apne dāman ko bachā kar rakhiye

aag sinon mein jala kar rakhiye

KHwab aankhon mein basa kar rakhiye

rahaton se lage sadme bhi hain

dil ko mazbut bana kar rakhiye

id ka din hai gale mil lije

iKHtilafat haTa kar rakhiye

nafraten dil se nikal jaengi

hath dushman se mila kar rakhiye

tab-e-zanjir nahin hai dil ko

zulf-e-pechan ko saja kar rakhiye

yaad aa jaegi diwane ki

phul joDe mein laga kar rakhiye

jaane wala na kabhi aaega

dil mein yaadon ko basa kar rakhiye

ishq ki aag hai munh-zor 'salam'

apne daman ko bacha kar rakhiye