aage wo ja bhi chuke lutf-e-nazara bhi gaya

aage vo jā bhī chuke lutf-e-nazāra bhī gayā

chashm-e-ġhaflat na khulī sub.h kā taarā bhī gayā

sard-mehrī se tirī garmī-e-ulfat na rahī

dil meñ uThtā thā jo har-dam vo sharāra bhī gayā

dil ke ā.īne meñ jab aap kī sūrat dekhī

jis ko dhokā maiñ samajhtā thā vo dhokā bhī gayā

ishq ko tāb-e-tajallī nahīñ kyā dekhegā

husn ye jaan ke pardoñ ko uThātā bhī gayā

kis ne paa.ī hai ġham-e-yār-e-mohabbat se najāt

ishq kā bojh kahīñ sar se utārā bhī gayā

tere qadmoñ pe jo lazzat hai vo hāsil na huī

yuuñ to sajde meñ sar-e-ijz jhukāyā bhī gayā

dil kī āshufta-mizājī meñ na kuchh farq aayā

bārhā zulf-e-pareshāñ ko sañvārā bhī gayā

māñgne se kahīñ ye chiiz milā kartī hai

dil churāne hī ke qābil thā churāyā bhī gayā

be-ḳhudī tujh pe tasadduq hoñ mire hosh-o-havās

sāmne hote hue un ko pukārā bhī gayā

ek hī chiiz hai parde meñ ki bairūn-e-hijāb

mujh ko zāhir bhī kiyā ḳhud ko chhupāyā bhī gayā

phir bhī āñkheñ rahīñ mahrūm-e-tamāshā-e-jamāl

un kī tasvīr ko shīshe meñ utārā bhī gayā

chhoḌ kar mujh ko bhañvar meñ na ḳhabar lī merī

ik sahārā thā tumhārā vo sahārā bhī gayā

pā-e-mahbūb pe sar rakh ke hue ham 'vāsil'

zindagī paa.ī na.ī maut kā dhaḌkā bhī gayā

dil ke ā.īne meñ nādīda tajallī dekhī

ḳhud-numā.ī kā bhalā ho ki vo pardā bhī gayā

aage wo ja bhi chuke lutf-e-nazara bhi gaya

chashm-e-ghaflat na khuli subh ka tara bhi gaya

sard-mehri se teri garmi-e-ulfat na rahi

dil mein uThta tha jo har-dam wo sharara bhi gaya

dil ke aaine mein jab aap ki surat dekhi

jis ko dhoka main samajhta tha wo dhoka bhi gaya

ishq ko tab-e-tajalli nahin kya dekhega

husn ye jaan ke pardon ko uThata bhi gaya

kis ne pai hai gham-e-yar-e-mohabbat se najat

ishq ka bojh kahin sar se utara bhi gaya

tere qadmon pe jo lazzat hai wo hasil na hui

yun to sajde mein sar-e-ijz jhukaya bhi gaya

dil ki aashufta-mizaji mein na kuchh farq aaya

barha zulf-e-pareshan ko sanwara bhi gaya

mangne se kahin ye chiz mila karti hai

dil churane hi ke qabil tha churaya bhi gaya

be-KHudi tujh pe tasadduq hon mere hosh-o-hawas

samne hote hue un ko pukara bhi gaya

ek hi chiz hai parde mein ki bairun-e-hijab

mujh ko zahir bhi kiya KHud ko chhupaya bhi gaya

phir bhi aankhen rahin mahrum-e-tamasha-e-jamal

un ki taswir ko shishe mein utara bhi gaya

chhoD kar mujh ko bhanwar mein na KHabar li meri

ek sahaara tha tumhaara wo sahaara bhi gaya

pa-e-mahbub pe sar rakh ke hue hum 'wasil'

zindagi pai nai maut ka dhaDka bhi gaya

dil ke aaine mein nadida tajalli dekhi

KHud-numai ka bhala ho ki wo parda bhi gaya