aaghosh-e-gul mein lazzat-e-sohbat nahin rahi

āġhosh-e-gul meñ lazzat-e-sohbat nahīñ rahī

kis se kahūñ ki qaus-e-mohabbat nahīñ rahī

maujūd huuñ bisāt-e-tamannā ke dasht meñ

pahlū meñ ābrū-e-hazīmat nahīñ rahī

dekhā use to qarz-e-vafā yaad aa gayā

bātoñ meñ us kī ḳhū-e-irādat nahīñ rahī

maiñ bhuul ke bhī us kī galī meñ na jā.ūñgī

pahchāntī huuñ dil meñ muravvat nahīñ rahī

shāmoñ ke saa.e DhūñDne nikle the kal yahīñ

kahte haiñ aaj ishq kī mohlat nahīñ rahī

bikhre hue haiñ lafz bhī nauhagarī kahāñ

dil meñ havā-e-ḳhalvat-o-jalvat nahīñ rahī

ab bas karo ki āñkhoñ meñ paanī nahīñ rahā

is zindagī meñ ab koī tohmat nahīñ rahī

aaghosh-e-gul mein lazzat-e-sohbat nahin rahi

kis se kahun ki qaus-e-mohabbat nahin rahi

maujud hun bisat-e-tamanna ke dasht mein

pahlu mein aabru-e-hazimat nahin rahi

dekha use to qarz-e-wafa yaad aa gaya

baaton mein us ki KHu-e-iradat nahin rahi

main bhul ke bhi us ki gali mein na jaungi

pahchanti hun dil mein murawwat nahin rahi

shamon ke sae DhunDne nikle the kal yahin

kahte hain aaj ishq ki mohlat nahin rahi

bikhre hue hain lafz bhi nauhagari kahan

dil mein hawa-e-KHalwat-o-jalwat nahin rahi

ab bas karo ki aankhon mein pani nahin raha

is zindagi mein ab koi tohmat nahin rahi