aaghosh-e-sitam mein hi chhupa le koi aa kar

āġhosh-e-sitam meñ hī chhupā le koī aa kar

tanhā to taḌapne se bachā le koī aa kar

sahrā meñ ugā huuñ ki mirī chhāñv koī paa.e

hiltā huuñ ki pattoñ kī havā le koī aa kar

biktā to nahīñ huuñ na mire daam bahut haiñ

raste meñ paḌā huuñ ki uThā le koī aa kar

kashtī huuñ mujhe koī kināre se to khole

tūfāñ ke hī kar jaa.e havāle koī aa kar

jab khīñch liyā hai mujhe maidān-e-sitam meñ

dil khol ke hasrat bhī nikāle koī aa kar

do chaar ḳharāshoñ se ho taskīn-e-jafā kyā

shīsha huuñ to patthar pe uchhāle koī aa kar

mere kisī ehsān kā badla na chukā.e

apnī hī vafāoñ kā sila le koī aa kar

aaghosh-e-sitam mein hi chhupa le koi aa kar

tanha to taDapne se bacha le koi aa kar

sahra mein uga hun ki meri chhanw koi pae

hilta hun ki patton ki hawa le koi aa kar

bikta to nahin hun na mere dam bahut hain

raste mein paDa hun ki uTha le koi aa kar

kashti hun mujhe koi kinare se to khole

tufan ke hi kar jae hawale koi aa kar

jab khinch liya hai mujhe maidan-e-sitam mein

dil khol ke hasrat bhi nikale koi aa kar

do chaar KHarashon se ho taskin-e-jafa kya

shisha hun to patthar pe uchhaale koi aa kar

mere kisi ehsan ka badla na chukae

apni hi wafaon ka sila le koi aa kar