aaghosh mein jo jalwagar ek naznin hua

āġhosh meñ jo jalvagar ik nāznīñ huā

añgushtarī banā mirā tan vo nagīñ huā

raunaq-fazā lahad pe jo vo mah-jabīñ huā

gumbad hamārī qabr kā charḳh-e-barīñ huā

kanda jahāñ meñ koī na aisā nagīñ huā

jaisā ki terā naam mire dil-nashīñ huā

raushan huā ye mujh pe ki fānūs meñ hai sham.a

haath us kā jalvagar jo tah-e-āstīñ huā

rakhtā hai ḳhaak par vo qadam jab ki naaz se

kahtā hai āsmān na kyuuñ maiñ zamīñ huā

raushan shabāb meñ jo huī sham-e-rū-e-yār

dūd-e-charāġh husn-e-ḳhat-e-ambarīñ huā

yā rab girā adū pe 'amānat' ke tū vo barq

do TukḌe jis se shahpar-e-rūhul-amīñ huā

aaghosh mein jo jalwagar ek naznin hua

angushtari bana mera tan wo nagin hua

raunaq-faza lahad pe jo wo mah-jabin hua

gumbad hamari qabr ka charKH-e-barin hua

kanda jahan mein koi na aisa nagin hua

jaisa ki tera nam mere dil-nashin hua

raushan hua ye mujh pe ki fanus mein hai shama

hath us ka jalwagar jo tah-e-astin hua

rakhta hai KHak par wo qadam jab ki naz se

kahta hai aasman na kyun main zamin hua

raushan shabab mein jo hui sham-e-ru-e-yar

dud-e-charagh husn-e-KHat-e-ambarin hua

ya rab gira adu pe 'amanat' ke tu wo barq

do TukDe jis se shahpar-e-ruhul-amin hua