aah aur ashk hi sada hai yan

aah aur ashk hī sadā hai yaañ

roz barsāt kī havā hai yaañ

jis jagah ho zamīn tafta samajh

ki koī dil-jalā gaḌā hai yaañ

go kudūrat se vo na deve ro

aarsī kī tarah safā hai yaañ

har ghaḌī dekhte jo ho īdhar

aisā ki tum ne aa niklā hai yaañ

rind muflis jigar meñ aah nahīñ

jaan mahzūñ hai aur kyā hai yaañ

kaise kaise makān haiñ suthre

ik azaañ jumla karbalā hai yaañ

ik sisaktā hai ek martā hai

har taraf zulm ho rahā hai yaañ

sad tamannā shahīd haiñ yakjā

sīna-kūbī hai ta.aziya hai yaañ

dīdanī hai ġharaz ye sohbat shoḳh

roz-o-shab tarfa mājrā hai yaañ

ḳhāna-e-āshiqāñ hai jā-e-ḳhūb

jaa.e rone kī jā-ba-jā hai yaañ

koh-o-sahrā bhī kar na jaa.e baash

aaj tak koī bhī rahā hai yaañ

hai ḳhabar shart 'mīr' suntā hai

tujh se aage ye kuchh huā hai yaañ

maut majnūñ ko bhī yahīñ aa.ī

kohkan kal hī mar gayā hai yaañ

aah aur ashk hi sada hai yan

roz barsat ki hawa hai yan

jis jagah ho zamin tafta samajh

ki koi dil-jala gaDa hai yan

go kudurat se wo na dewe ro

aarsi ki tarah safa hai yan

har ghaDi dekhte jo ho idhar

aisa ki tum ne aa nikla hai yan

rind muflis jigar mein aah nahin

jaan mahzun hai aur kya hai yan

kaise kaise makan hain suthre

ek azan jumla karbala hai yan

ek sisakta hai ek marta hai

har taraf zulm ho raha hai yan

sad tamanna shahid hain yakja

sina-kubi hai taziya hai yan

didani hai gharaz ye sohbat shoKH

roz-o-shab tarfa majra hai yan

KHana-e-ashiqan hai ja-e-KHub

jae rone ki ja-ba-ja hai yan

koh-o-sahra bhi kar na jae bash

aaj tak koi bhi raha hai yan

hai KHabar shart 'mir' sunta hai

tujh se aage ye kuchh hua hai yan

maut majnun ko bhi yahin aai

kohkan kal hi mar gaya hai yan