aai hai jaane kaise ilaqon se raushni

aa.ī hai jaane kaise ilāqoñ se raushnī

aur DhūñDhtī hai kis ko zamānoñ se raushnī

ho kar rahī vo ek zamāne pe munkashif

dīvār se rukī na darīchoñ se raushnī

mauj-e-yaqīñ ke haath na aa.ī tamām-umr

vo lau jise milī hai gumānoñ se raushnī

karte haiñ aaj us pe mah-o-āftāb rashk

āñkhoñ ko jo milī tire ḳhvāboñ se raushnī

mahkī huī huuñ aap kī qurbat se merī jaan

kal raat kah rahī thī charāġhoñ se raushnī

pahle maiñ ek harf-e-ujālā aur us ke ba.ad

aane lagī hai kitnī kitāboñ se raushnī

pahle charāġh-e-chashm ko raushan kiyā thā maiñ

phir phūTne lagī thī sitāroñ se raushnī

harf-e-suḳhan se khul ga.ī duniyā pe ai 'atīq'

dil meñ hai kaise kaise ḳhayāloñ se raushnī

aai hai jaane kaise ilaqon se raushni

aur DhunDhti hai kis ko zamanon se raushni

ho kar rahi wo ek zamane pe munkashif

diwar se ruki na darichon se raushni

mauj-e-yaqin ke hath na aai tamam-umr

wo lau jise mili hai gumanon se raushni

karte hain aaj us pe mah-o-aftab rashk

aankhon ko jo mili tere KHwabon se raushni

mahki hui hun aap ki qurbat se meri jaan

kal raat kah rahi thi charaghon se raushni

pahle main ek harf-e-ujala aur us ke baad

aane lagi hai kitni kitabon se raushni

pahle charagh-e-chashm ko raushan kiya tha main

phir phuTne lagi thi sitaron se raushni

harf-e-suKHan se khul gai duniya pe ai 'atiq'

dil mein hai kaise kaise KHayalon se raushni