aai hai kuchh na puchh qayamat kahan kahan

aa.ī hai kuchh na pūchh qayāmat kahāñ kahāñ

uf le ga.ī hai mujh ko mohabbat kahāñ kahāñ

betābī-o-sukūñ kī huiiñ manzileñ tamām

bahlā.eñ tujh se chhuT ke tabī'at kahāñ kahāñ

furqat ho yā visāl vahī iztirāb hai

terā asar hai ai ġham-e-furqat kahāñ kahāñ

har jumbish-e-nigāh meñ sad-kaif be-ḳhudī

bhartī phiregī husn kī niyyat kahāñ kahāñ

rāh-e-talab meñ chhoḌ diyā dil kā saath bhī

phirte liye hue ye musībat kahāñ kahāñ

dil ke ufuq tak ab to haiñ parchhā.iyāñ tirī

le jaa.e ab to dekh ye vahshat kahāñ kahāñ

ai nargis-e-siyāh batā de tire nisār

kis kis ko hai ye hosh ye ġhaflat kahāñ kahāñ

nairañg-e-ishq kī hai koī intihā ki ye

ye ġham kahāñ kahāñ ye masarrat kahāñ kahāñ

begāngī par us kī zamāne se ehtirāz

dar-parda us adā kī shikāyat kahāñ kahāñ

farq aa gayā thā daur-e-hayāt-o-mamāt meñ

aa.ī hai aaj yaad vo sūrat kahāñ kahāñ

jaise fanā baqā meñ bhī koī kamī sī ho

mujh ko paḌī hai terī zarūrat kahāñ kahāñ

duniyā se ai dil itnī tabī'at bharī na thī

tere liye uThā.ī nadāmat kahāñ kahāñ

ab imtiyāz-e-ishq-o-havas bhī nahīñ rahā

hotī hai terī chashm-e-ināyat kahāñ kahāñ

har gaam par tarīq-e-mohabbat meñ maut thī

is raah meñ khule dar-e-rahmat kahāñ kahāñ

hosh-o-junūñ bhī ab to bas ik baat haiñ 'firāq'

hotī hai us nazar kī sharārat kahāñ kahāñ

aai hai kuchh na puchh qayamat kahan kahan

uf le gai hai mujh ko mohabbat kahan kahan

betabi-o-sukun ki huin manzilen tamam

bahlaen tujh se chhuT ke tabi'at kahan kahan

furqat ho ya visal wahi iztirab hai

tera asar hai ai gham-e-furqat kahan kahan

har jumbish-e-nigah mein sad-kaif be-KHudi

bharti phiregi husn ki niyyat kahan kahan

rah-e-talab mein chhoD diya dil ka sath bhi

phirte liye hue ye musibat kahan kahan

dil ke ufuq tak ab to hain parchhaiyan teri

le jae ab to dekh ye wahshat kahan kahan

ai nargis-e-siyah bata de tere nisar

kis kis ko hai ye hosh ye ghaflat kahan kahan

nairang-e-ishq ki hai koi intiha ki ye

ye gham kahan kahan ye masarrat kahan kahan

begangi par us ki zamane se ehtiraaz

dar-parda us ada ki shikayat kahan kahan

farq aa gaya tha daur-e-hayat-o-mamat mein

aai hai aaj yaad wo surat kahan kahan

jaise fana baqa mein bhi koi kami si ho

mujh ko paDi hai teri zarurat kahan kahan

duniya se ai dil itni tabi'at bhari na thi

tere liye uThai nadamat kahan kahan

ab imtiyaz-e-ishq-o-hawas bhi nahin raha

hoti hai teri chashm-e-inayat kahan kahan

har gam par tariq-e-mohabbat mein maut thi

is rah mein khule dar-e-rahmat kahan kahan

hosh-o-junun bhi ab to bas ek baat hain 'firaq'

hoti hai us nazar ki shararat kahan kahan