aain-e-wafa itna bhi sada nahin hota

ā.īn-e-vafā itnā bhī saada nahīñ hotā

har baar masarrat kā i.aada nahīñ hotā

ye kaisī sadāqat hai ki pardoñ meñ chhupī hai

iḳhlās kā to koī labāda nahīñ hotā

jañgal ho ki sahrā kahīñ ruknā hī paḌegā

ab mujh se safar aur ziyāda nahīñ hotā

ik aañch kī pahle bhī kasar rahtī rahī hai

kyuuñ sātvāñ dar mujh pe kushāda nahīñ hotā

sach baat mire muñh se nikal jaatī hai aksar

har-chand mirā aisā irāda nahīñ hotā

ai harf-e-sanā sehr-e-musallam tirā tujh se

baḌh kar to koī sāġhar-e-bāda nahīñ hotā

afsāna-e-afsūn-e-javānī ke alāva

kis baat kā duniyā meñ i.aada nahīñ hotā

sūraj kī rifāqat meñ chamak uThtā hai chehra

'shabnam' kī tarah se koī saada nahīñ hotā

aain-e-wafa itna bhi sada nahin hota

har bar masarrat ka iada nahin hota

ye kaisi sadaqat hai ki pardon mein chhupi hai

iKHlas ka to koi labaada nahin hota

jangal ho ki sahra kahin rukna hi paDega

ab mujh se safar aur ziyaada nahin hota

ek aanch ki pahle bhi kasar rahti rahi hai

kyun satwan dar mujh pe kushada nahin hota

sach baat mere munh se nikal jati hai aksar

har-chand mera aisa irada nahin hota

ai harf-e-sana sehr-e-musallam tera tujh se

baDh kar to koi saghar-e-baada nahin hota

afsana-e-afsun-e-jawani ke alawa

kis baat ka duniya mein iada nahin hota

suraj ki rifaqat mein chamak uThta hai chehra

'shabnam' ki tarah se koi sada nahin hota