aaina-dar-e-jalwa-e-jaanana ban gaya

ā.īna-dār-e-jalva-e-jānāna ban gayā

har zarra kā.enāt kā dīvāna ban gayā

mahfil meñ un kī sūrat-e-parvāna ban gayā

jis meñ zarā bhī hosh thā dīvāna ban gayā

qaa.em rahā namāz meñ bhī zauq-e-ma.asiyat

uTThe duā ko haath to paimāna ban gayā

terī samā.ī vus.at-e-kaunain meñ na thī

merā hī dil thā jo tirā kāshāna ban gayā

kuchh is tarah se hashr meñ badlī mirī zabāñ

merā fasāna aap kā afsāna ban gayā

mujh rind-e-bāda-mast kī qismat to dekhiye

abr-e-karam bhī josh meñ mai-ḳhāna ban gayā

'raushan' zahe-nasīb ki qadmoñ pe husn ke

maiñ jaan de ke hāsil-e-afsāna ban gayā

aaina-dar-e-jalwa-e-jaanana ban gaya

har zarra kaenat ka diwana ban gaya

mahfil mein un ki surat-e-parwana ban gaya

jis mein zara bhi hosh tha diwana ban gaya

qaem raha namaz mein bhi zauq-e-masiyat

uTThe dua ko hath to paimana ban gaya

teri samai wusat-e-kaunain mein na thi

mera hi dil tha jo tera kashana ban gaya

kuchh is tarah se hashr mein badli meri zaban

mera fasana aap ka afsana ban gaya

mujh rind-e-baada-mast ki qismat to dekhiye

abr-e-karam bhi josh mein mai-KHana ban gaya

'raushan' zahe-nasib ki qadmon pe husn ke

main jaan de ke hasil-e-afsana ban gaya