aaina dekhta hun nazar aa rahe ho tum

ā.īna dekhtā huuñ nazar aa rahe ho tum

kitne qarīb mujh se hue jā rahe ho tum

ye kyā fareb hai ki jo farmā rahe ho tum

maiñ ḳhud ko DhūñDhtā huuñ mile jā rahe ho tum

tum ko ye pech-o-tāb kī mushkil hai merī raah

mujh ko ye iztirāb ki ghabrā rahe ho tum

itnā bhī kar sakegā na kyā merā dast-e-shauq

kyuuñ zulf-e-kā.enāt ko suljhā rahe ho tum

tum ho tumhārā maiñ huuñ tumhārī bahār hai

ye kis ko dekh dekh ke sharmā rahe ho tum

āñkhoñ meñ ashk dil meñ ḳhalish lab pe hai fuġhāñ

ye ḳhud taḌap rahe ho ki taḌpā rahe ho tum

merā chaman to hai magar apnā kahūñ na maiñ

haañ maiñ samajh rahā huuñ jo samjhā rahe ho tum

hai un ko naaz parda-e-māh-o-nujūm par

kaise kahūñ ki saaf nazar aa rahe ho tum

rah rah ke kauñdtī haiñ añdhere meñ bijliyāñ

tum yaad kar rahe ho ki yaad aa rahe ho tum

is kā malāl hai ki sitam sah rahe haiñ ham

is kā gilā nahīñ ki sitam Dhā rahe ho tum

aaina dekhta hun nazar aa rahe ho tum

kitne qarib mujh se hue ja rahe ho tum

ye kya fareb hai ki jo farma rahe ho tum

main KHud ko DhunDhta hun mile ja rahe ho tum

tum ko ye pech-o-tab ki mushkil hai meri rah

mujh ko ye iztirab ki ghabra rahe ho tum

itna bhi kar sakega na kya mera dast-e-shauq

kyun zulf-e-kaenat ko suljha rahe ho tum

tum ho tumhaara main hun tumhaari bahaar hai

ye kis ko dekh dekh ke sharma rahe ho tum

aankhon mein ashk dil mein KHalish lab pe hai fughan

ye KHud taDap rahe ho ki taDpa rahe ho tum

mera chaman to hai magar apna kahun na main

han main samajh raha hun jo samjha rahe ho tum

hai un ko naz parda-e-mah-o-nujum par

kaise kahun ki saf nazar aa rahe ho tum

rah rah ke kaundti hain andhere mein bijliyan

tum yaad kar rahe ho ki yaad aa rahe ho tum

is ka malal hai ki sitam sah rahe hain hum

is ka gila nahin ki sitam Dha rahe ho tum