aaina-e-hayat hai yaksar lahu lahu

ā.īna-e-hayāt hai yaksar lahū lahū

lamhoñ ke haath meñ bhī hai patthar lahū lahū

sāñsoñ ke āsmāñ kā hai manzar lahū lahū

jaise ho kā.enāt kā daftar lahū lahū

aatī nahīñ hai ab koī nāqūs kī sadā

ehsās-e-be-navā kā hai mandar lahū lahū

ham shahr-e-dushmanāñ se nikal aa.e haiñ ba-ḳhair

thā dostoñ ke shahr kā manzar lahū lahū

aate hī apne hosh meñ dekhā hai jā-ba-jā

apne tasavvurāt kā paikar lahū lahū

jab fan ke regzār meñ chalne lagī thī lū

thā fikr kā amiiq samundar lahū lahū

ḳhvāhish kī bastiyoñ meñ ye manzar bhī ḳhuub hai

vīrān rahguzar hai to ghar ghar lahū lahū

aaina-e-hayat hai yaksar lahu lahu

lamhon ke hath mein bhi hai patthar lahu lahu

sanson ke aasman ka hai manzar lahu lahu

jaise ho kaenat ka daftar lahu lahu

aati nahin hai ab koi naqus ki sada

ehsas-e-be-nawa ka hai mandar lahu lahu

hum shahr-e-dushmanan se nikal aae hain ba-KHair

tha doston ke shahr ka manzar lahu lahu

aate hi apne hosh mein dekha hai ja-ba-ja

apne tasawwuraat ka paikar lahu lahu

jab fan ke regzar mein chalne lagi thi lu

tha fikr ka amiq samundar lahu lahu

KHwahish ki bastiyon mein ye manzar bhi KHub hai

viran rahguzar hai to ghar ghar lahu lahu