aaina ho ke aaina na hua

aa.ina ho ke aa.ina na huā

us kā va.ada kabhī vafā na huā

ik sitam bhī karam-numā na huā

zaḳhm khā kar bhī kuchh bhalā na huā

us ko apnā banānā chāhā thā

ham se iz.hār-e-mudda.ā na huā

baat karte to baat ban jaatī

baat karne kā hausla na huā

us ne zulfoñ se Dhak liyā chehra

chāñd se koī rābta na huā

har nazar meñ hai vasl kī chāhat

ishq meñ koī pārsā na huā

TuuTe rishtoñ ko joḌte kaise

jab kabhī us se sāmnā na huā

baat ham ḳhud-kushī kī kyoñ karte

haq bhī jiine kā jab adā na huā

ham ko tanhā.iyoñ ke ma.abad meñ

kuchh bhī kahne kā hausla na huā

laakh da.ave kiye ḳhudā.ī ke

ek fir.aun bhī ḳhudā na huā

dil to mansūb thā usī se 'suhaib'

umr bhar jis se rābta na huā

aaina ho ke aaina na hua

us ka wada kabhi wafa na hua

ek sitam bhi karam-numa na hua

zaKHm kha kar bhi kuchh bhala na hua

us ko apna banana chaha tha

hum se izhaar-e-muddaa na hua

baat karte to baat ban jati

baat karne ka hausla na hua

us ne zulfon se Dhak liya chehra

chand se koi rabta na hua

har nazar mein hai wasl ki chahat

ishq mein koi parsa na hua

TuTe rishton ko joDte kaise

jab kabhi us se samna na hua

baat hum KHud-kushi ki kyon karte

haq bhi jine ka jab ada na hua

hum ko tanhaiyon ke mabad mein

kuchh bhi kahne ka hausla na hua

lakh dawe kiye KHudai ke

ek firaun bhi KHuda na hua

dil to mansub tha usi se 'suhaib'

umr bhar jis se rabta na hua