aaj guzre hue lamhon ko pukara jae

aaj guzre hue lamhoñ ko pukārā jaa.e

dil ko phir ḳhūn-e-tamannā se sañvārā jaa.e

merā har shauq bhī ho un kā har andāz bhī ho

dil meñ ab naqsh koī aisā utārā jaa.e

jab thakī-māñdī paḌī sotī ho har shorish-e-ġham

hijr kī raat ko kis tarah guzārā jaa.e

kuchh ho meyār-e-ḳhirad chāk-e-qabā aib sahī

chashm-e-ma.asūm kā ḳhālī na ishārā jaa.e

ābla-pā hai to kyā hai tū vo sargarm-e-safar

qāfile vaalo 'sabā' ko to pukārā jaa.e

aaj guzre hue lamhon ko pukara jae

dil ko phir KHun-e-tamanna se sanwara jae

mera har shauq bhi ho un ka har andaz bhi ho

dil mein ab naqsh koi aisa utara jae

jab thaki-mandi paDi soti ho har shorish-e-gham

hijr ki raat ko kis tarah guzara jae

kuchh ho meyar-e-KHirad chaak-e-qaba aib sahi

chashm-e-masum ka KHali na ishaara jae

aabla-pa hai to kya hai tu wo sargarm-e-safar

qafile walo 'saba' ko to pukara jae