aaj mehndi lagae baiThe hain

aaj mehñdī lagā.e baiThe haiñ

ḳhuub vo rañg laa.e baiThe haiñ

mere aate hī ho ga.e barham

kuchh kasī ke sikhā.e baiThe haiñ

teġh khīñchī hai qatl par mere

haath mujh se uThā.e baiThe haiñ

maiñ shikāyat jafā kī kartā huuñ

chupke vo sar jhukā.e baiThe haiñ

dum churā.e hue paḌe haiñ ham

vo jo bālīñ pe aa.e baiThe haiñ

imtihāñ ko kahā to bole vo

ham tumheñ āzmā.e baiThe haiñ

kas ko nazroñ se aaj utāreñge

kyuuñ vo tevarī chaḌhā.e baiThe haiñ

dekhiye kab vo sham.a-rū aa.e

shaam se lau lagā.e baiThe haiñ

Tālnā vasl kā jo hai manzūr

ḳhud se ḳhud muñh thūthā.e baiThe haiñ

sāda-pan meñ hazār jauban hai

baal khole nahā.e baiThe haiñ

kaun pahlū se uTh gayā 'anjum'

aap kyuuñ dil dabā.e baiThe haiñ

aaj mehndi lagae baiThe hain

KHub wo rang lae baiThe hain

mere aate hi ho gae barham

kuchh kasi ke sikhae baiThe hain

tegh khinchi hai qatl par mere

hath mujh se uThae baiThe hain

main shikayat jafa ki karta hun

chupke wo sar jhukae baiThe hain

dum churae hue paDe hain hum

wo jo baalin pe aae baiThe hain

imtihan ko kaha to bole wo

hum tumhein aazmae baiThe hain

kas ko nazron se aaj utarenge

kyun wo tewari chaDhae baiThe hain

dekhiye kab wo shama-ru aae

sham se lau lagae baiThe hain

Talna wasl ka jo hai manzur

KHud se KHud munh thuthae baiThe hain

sada-pan mein hazar jauban hai

baal khole nahae baiThe hain

kaun pahlu se uTh gaya 'anjum'

aap kyun dil dabae baiThe hain