aaj to hamdam azm hai ye kuchh hum bhi rasmi kaam karen

aaj to hamdam azm hai ye kuchh ham bhī rasmī kaam kareñ

kilk uThā kar yaar ko apne nāma-e-shauq arqām kareñ

ḳhūbī se alqāb likheñ ādāb bhī ḳhush-ā.īnī se

ba.ad is ke ham tahrīr mufassal furqat ke ālām kareñ

yā ḳhud aave aap idhar yā jald bulāve ham ko vahāñ

is matlab ke likhne ko bhī ḳhuub sā sar-anjām kareñ

husn ziyāda aan mo.assir naaz kī shoḳhī ho vo chand

aise kitne harf likheñ aur naa.e ko ashmām kareñ

sun kar vo hañs kar yuuñ bolā ye to tumheñ hai fikr abas

aql jinheñ hai vo to hargiz ab na ḳhayāl-e-ḳhām kareñ

kaam yaqīnan hai vahī achchhā jo ki ho apne mauqa.a se

baat kaheñ yā naama likheñ yaaro sub.h se shaam kareñ

is meñ bhalā kyā hāsil hogā soch to dekho miyāñ 'nazīr'

vo to ḳhafā ho pheñk de ḳhat aur log tumheñ bad-nām kareñ

aaj to hamdam azm hai ye kuchh hum bhi rasmi kaam karen

kilk uTha kar yar ko apne nama-e-shauq arqam karen

KHubi se alqab likhen aadab bhi KHush-aini se

baad is ke hum tahrir mufassal furqat ke aalam karen

ya KHud aawe aap idhar ya jald bulawe hum ko wahan

is matlab ke likhne ko bhi KHub sa sar-anjam karen

husn ziyaada aan moassir naz ki shoKHi ho wo chand

aise kitne harf likhen aur nae ko ashmam karen

sun kar wo hans kar yun bola ye to tumhein hai fikr abas

aql jinhen hai wo to hargiz ab na KHayal-e-KHam karen

kaam yaqinan hai wahi achchha jo ki ho apne mauqa se

baat kahen ya nama likhen yaro subh se sham karen

is mein bhala kya hasil hoga soch to dekho miyan 'nazir'

wo to KHafa ho phenk de KHat aur log tumhein bad-nam karen